Parlamentario Setty Christiaans:
ORANJESTAD (AAN): Cu asombro Parlamentario Setty Christiaans-Yarzagaray di MEP a tuma nota cu Parlamentario Eman ta na Hulanda presentando un plan cu segun e por brinda solucion pa Aruba. Awor diripiente e tin e curashi pa yega Hulanda despues cu na 2015 Hulanda a nenga pa ancra presupuesto di Mike su gabinete pa mal maneho financiero, unda ela manda algun expresion den direccion di e Hulandesnan cu pa basta aña e no a durf subi avion mas yega Den Haag.
Central Planbureau: Con e por tin e hipocresia di bay te Hulanda pa presenta solucion cu ni na Aruba e ta haci esaki despues di su mal maneho financiero, economico real y social cultural. Awe eta cana rond presenta un plan pa un “Sociaal Economisch Planbureau” den colaboracion cu Hulanda siendo na Hulanda mes esaki ta existi desde 1973, pues no ta inventando niun wiel aki. Durante tempo di su mal maneho caba a conseha pa bin cu un Centraal Planbureau (CPB). Kico CPB? Esaki ta un instituto independiente cu ta haci investigacion y ta brinda analisis (socio) economico relevante cu base neutral y basa riba hecho(nan) pa maneho riba propio iniciativa of riba peticion di Gobierno, Parlamento, etc. CPB ta analisa consecuencianan pa e economia door di maneho nobo of adaptacion den maneho cu den cierto sentido por yam’e ‘Bureau for Economic Policy Analysis’.
Sociaal Economisch Planbureau: Pero Mike ta presenta Sociaal Economisch Planbureau cu eigenlijk na Hulanda yama Sociaal en Cultureel Planbureau (SCP). Esaki tambe ta un instituto cientifico independiente cu ta haci investigacion y ta duna conseho riba peticion of no, explorando y splicando situacion cu ta biba den pueblo y calidad di bida, door di evalua maneho di gobierno y cu mira riba maneho den futuro.
Pregunta na Mike ta dicon (te) awor? Bo kier yega na un bista holisitico di complexidad y retonan di Aruba cu awe a wordo ocasiona pa bo mal maneho financiero. Awor cu bo ta un Parlamentario cu practicamente no ta traha, bo ta bay Hulanda presenta posibel plan. Pero bo no ta eherciendo un trabou di maneho y no ta minister president di pais Aruba pa mas cu 6 aña caba.
Mike Eman nunca a kere den data: Pa colmo, den Yarzagaray su experiencia trahando na CBS, durante bo 8 aña di gobernacion, bo no ta ni kere den data. Parlamentario Yarzagaray ta bisa di sa esaki paso pa ehecucion di Censo 2010 mester a presupuesta esaki y bo a nenga pa financia esaki via Landsbegroting. Siendo Censo ta e investigacion cu ta produci mas informacion di e pueblo y vivienda na Aruba. E instituto mester a haci su mesun esfuerso pa ehecucion di un Censo siendo esaki un rekisito di Nacionnan Uni cada 10 aña.
Ademas, ora a calcula e indice di pobresa basa riba resultado di Censo, a nenga pa publica esaki. Ta mane bo no kier pa pueblo haya sa e informacion aki. Ta te despues di 2017 a publica e indice di pobresa despues cu Gabinete Wever-Croes a sinta. Awor con bo por kere bo por bende bo plan siendo bo no ta ni un persona cu ta kere den data cu ta e base di tanto un CPB como un SCP? Riba e website di SCP tin un publicacion “Kwestie voor het kiezen 2023” cu ta pa preparando e pueblo di Hulanda pa e eleccion cu ta na caminda dia 22 di november proximo. E ora e otro pregunta na Mike ta: cu ken bo ta papia siendo cu tur cos ta mustra segun polling (data) cu e panorama politico ta bay cambia na Hulanda? Na final di dia, ta den Parlamento di Aruba bo ta traha shon.
