ORANJESTAD (AAN): Un Cena Multicultural masha special ta worde organiza awe Diasabra anochi, organiza pa partido AVP, den cual nan lo celebra e union di tur e diferente comunidadnan y nacionalidadnan cu ta biba na Aruba.
E evento lo tuma lugar Diasabra 25 di november, cuminsando for di 7’or di anochi.
E encuentro cu un cena special aki ta dedica na un matriarca memorabel di e bario di Rancho, señora Ma Dora Palm, cu a enrikese e patrimonio comparti cu su trabao duru, su balornan familiar y su lealtad.
Lo bini hunto den Rancho, e bario historico, na un mesa largo den e henter e largura di Avenida Alo Tromp. E formato ta inspira pa e longtable dinner di Renaissance Resort. E lo ta algo hopi bunita decora, na unda cada stoel lo ta un luga di unidad y gratitud. E evento aki lo expone e variedad rico di cultura, sabor y tradicionnan cu lo simbolisa e harmonia cu ta defini nos isla.
Mientras solo baha riba Rancho, lo comparti storianan, alegria y e cena prepara door di chefnan talentoso cu ta representa e cushinanan di tur e nacionalidadnan cu a yuda construi nos pais.
Musica y actuacionnan bibo di talentonan multicultural di Aruba lo yena e aire cu melodianan cu lo resona cu e ambiente di union. E publico lo gosa di musicanan live di cancionnan di Padu presenta pa nada menos cu su yiu muher Vichy Lampe y Victor Samuel. E homenahe simpel y sincero na señora Ma Dora Palm lo corda con importante e ta pa rindi honor na esnan cu a duna forma na e legado di comunidad.
