Den presupuesto 2025 PPA a presenta un amienda pa aloca 12 miyon florin pa KPA y Grensbewaking

Eduard Pieters, fraccion PPA

*Pero coalicion a bari’e for di mesa 

ORANJESTAD (AAN)--Parlamentario Eduard Pieters di Fraccion di PPA, a remarca, den entrevista cu DIARIO, cu loke ta pasando na Aruba ta hopi lamentable, pasobra nada ta wordo haci riba tereno di husticia. El a señala cu fraccion di PPA a purba di traha di manera preventivo, y for di aña pasa caba nan ta bati na porta tur caminda pa bin cu un solucion. “Wak, e ta facil pa nos para na banda como oposicion, anto critica gobierno. E ta facil! Pero PPA su style no ta pa critica gobierno so, sino pa bin cu un solucion tambe”, Pieters a señala.

E ta recorda cu na December 2024 tabata tin eleccion, na Januari Parlamento a keda instala, y ta lamentable cu a pone Parlamento yama un reunion publico, den cual fraccion di PPA a presenta un mocion riba papel, cual a wordo sosteni, carga, acepta, pa tur fraccion den Parlamento.”Esey ta algo hopi bunita pasobra akinan por a mustra cu nos por a uni pa un bon causa. Esaki tabata 4 di Maart 2025. Un aña y siete luna pasa”, Pieters a remarca.

El a agrega cu e por mustra un firma, y a puntra ta di ken e ta? Well, e ta e firma di Arthur Dowers, ken awe ta Minister di Husticia. “Kiermen, Minister Dowers tambe a bay di acuerdo cu e mocion aki. Anto kico e mocion aki ta papia di dje? Pa di un forma preventivo bin cu bodycam, percura pa tratamento psicologico interno dentro di KPA, bin cu material, uniform, etc. Nos a haya un KPA tur daña, tur kibra, e ta un berguenza. Kiermen, nos tin cu duna honor na nos Cuerpo Policial cu tin cu percura pa orden publico. Nos a pidi pa un termino limita, en todo caso, pa nan percura p’esaki”, Eduard Pieters di fraccion di PPA a enfatiza.

Esaki tabata na Maart 2025, y minister Dowers a contesta cu “cos ta dificil, cu nan a hereda un situacion dificil, etc. PPA no a keda te eynan. “PPA a bisa, OK si e situacion ta dificil, no tin placa, pero, supuestamente tin 5 miyon na surplus, nos ta bay yuda gobierno. Con? Nos a bin cu un amienda; Den e presupuesto 2025, nos a bin cu un prome amienda, caminda cu nos a aloca 12 miyon florin pa Cuerpo Policial y Grensbewaking. Anto, e fraccion mas grandi di coalicion a bisa NO, y no a vota pro. Kiermen, nos a purba di bin cu un solucion strategico pa Minister Dowers, pero coalicion a bari’e for di mesa.