ORANJESTAD (AAN): Informacion for di Den Haag, ta indica cu Minister Plenipotenciario Guillfred Besaril a elabora riba e aspecto politico na Hulanda cu tambe ta
interesante pa Aruba.
Ta pa e motibo ey cu minister Besaril den nomber di Gobierno di Aruba y muy en especial di e tres Kabinetnan na Hulanda, esta e casnan di e Ministernan Plenipotenciario di Curaçao, St. Maarten y Aruba ta felicita señora Jorien Wuite como miembro di parlamento di Hulanda, esta Tweede Kamer.
Señora Wuite tabata Minister Plenipotenciario di St. Maarten y ultimo el a forma parti di e partido D66 y a bay eleccion pa parlamentario di Hulanda y exitosamente el a logra drenta parlamento di Hulanda.
‘Pero no solamente cu el a drenta parlamento di Hulanda pero algo ya hopi importante cu a sosode pa nos islanan ta cu ya fraccion di D66 a apunte como e persona encarga cu e cartera Relacionnan di Reino den Tweede Kamer. Pues nos tin un hende cu berdaderamente tin conocimento di kico ta un persona Caribense; kico ta e islanan. Un hende cu nos a sinta hopi cune den diferente reunion como Minister Plenipotenciario. Esaki ta hopi importante pasobra señora Wuite conoce e casnan, e situacionnan, e conoce e indole di e negosacionnan pa loke ta e entidadnan nobo, pues nos tin un entrada cerca un persona cu nos bo por bisa ta un hende di nos.’
Minister Besaril a sigui bisa cu ta bunita pa mira cu despues cu señora Wuite a manifesta su mes como Minister Plenipotenciario na Hulanda y cu awe el a logra drenta den Tweede Kamer. Minister Besaril: ‘Nos por bisa cu nos tin un aliado, un persona cu por lo menos sa mas di e materia di e islanan den e parti Caribense di Reino. Un palabra di felicitacion pa señora Wuite y mi ta desea su persona hopi exito y forza den tur loke ta bini. Mi ta kere cu na momento cu tin un formacion concreto di e proximo Gobierno Hulandes, e ora ey señora Wuite lo tin un funcion fijo. Pero mi ta premira cu den cualkier tereno cu señora Wuite termina, elo ta bay sea na cabes di e comision “Koninkrijksrelaties” of e lo tin tarea basta extensivo pa loke ta e materia di e relacionnan di Reino,’ segun Minister Plenipotenciario Guillfred Besaril.
Riba e potret pa cortesia Cas di Aruba, por mira e bishita di cortesia di Jorien Wuite como Minister Plenipotenciario cerca su colega di Aruba.
