ORANJESTAD(AAN)- Na e momentonan aki e parti mas intenso di e proceso electoral ta tuma luga. E parti cu ta duna mas trabou pero na mes momento ta
crea hopi preocupacion.
Partidonan cu kier participa na eleccion, ta atende cu personanan cu lo bira candidato riba nan lista, cu ta e unico forma cu segun nos leynan hende por participa den Parlamento di Aruba.
Pa Ley e personanan cu ta bira candidato di un partido, ta firma un documento cu por compara cu un contracto, den cual e candidato ta permiti e partido pa uza su nomber riba su lista y ta declara su mes dispuesto pa representa pueblo pa medio di e partido.
Sin e acuerdo firma entre partido y candidato, ni partido ni candidato por participa na eleccion. Ley ta bisa cu e partido mester di candidato y cu e candidato mester di partido.
Pa un persona ta den Parlamento, Ley ta exigi pa e participa na e proceso legal pa medio di un partido cu na eleccion ta haya suficiente voto pa su candidato of candidatonan drenta Parlamento.
E proceso di candidatura ta tuma su tempo pa motibonan legal. E candidato y e partido mester cumpli cu reglanan di ley. No ta tur hende por ta candidato di un partido, cu pueblo mester acepta dor di sosten cu pueblo ta duna na e partido pa e ta parti di eleccion.
Representa Pueblo ta algo sumamente serio. E ta base di nos sistema di gobernacion pasobra ta e personanan cu drenta Parlamento ta bay dicidi riba gobernacion di un pais.
Henter e proceso di eleccion ta bira un farce si candidatonan no tene nan mes na regla.
E candidato ta drenta Parlamento como parti di un lista pues cu ta honra e areglonan legal pa e partido drenta Parlamento.
E candidato aki hamas por actua como miembro di otro partido of como independiente pasobra e ta kibra regla di eleccion. E ta viola ley, punto.
Si e concenshi di e miembro di Parlamento no ta permiti pa e keda den e partido, nan ta bandona e partido y ta entrega e asiento na e siguiente persona riba lista di e partido.
Ley no ta permiti pa un persona uza su asiento den Parlamento pa blackmail su partido. Kico esaki ta nifica?
Si un persona ta sinti cu e no por sostene su partido mas, e ta distancia di e partido y di e asiento cu e tin di e partido. E ta bandona Parlamento.
E hecho cu ta permiti un persona bira independiente, ta habri caminda pa blackmail contra partidonan den Parlamento, loke ta un violacion di Ley.
Un persona cu segun su concenshi no por sostene un partido mas, ta entrega su asiento.
Pa Mike Eman tambe mester asumi cu ta su concenshi no a permiti pa el a fungi como lider di oposicion como lider di fraccion di su partido. Pasobra ta Mike a haya votonan di AVP y no pa e manipula e partido, pero pa e representa e partido den Parlamento.
Ta ilegal pa no cumpli cu deseo di Pueblo despues di eleccion sin un motibo aceptabel. Ta un violacion di ley pa hasta kibra e resultado di eleccion, e cantidad di asientonan cu Pueblo a duna cada partido den Parlamento.
Ta un violacion di Ley cu un persona ta uza resultado di eleccion di un partido, pa e profila su mes como candidato di un partido cu nunca a participa na eleccion manera ta e caso di Daphne Lejuez.
Na e momentonan aki parha di tur color ta trata di yega Parlamento pa medio di nan partido.
Proceso electoral no a wordo introduci pa sirbi hende cu kier puesto, pero pa e pais por wordo goberna a base di Ley, cu a perde tur balor cu hendenan manera Mike Eman y Daphne Lejuez y tur cu a uza politica como trampolin pa bay receptie, gana bon salario y haya un imagen publico riba lomba di Aruba.
