Corporate Good Governance no ta un opcion. E ta un obligacion!

Parlamentario Dangui Oduber na Minister Wendrick Cicilia:

Un minister hoben y bon studia poniendo presion riba codigo di bon gobernacion 

ORANJESTAD (AAN):  Cu hopi preocupacion mi a bin ta tuma nota di e ultimo desaroyonan pa loke ta trata decisionnan di Minister actual di Turismo sr. Wendrick Cicilia. Como representante di pueblo, specialmente como un persona cu a traha na honor di bon gobernacion, integridad y transparencia mi ta lamenta di mira un hoben hurista ta tuma decisionnan cu ta pone e principionan di transparencia, responsabilidad y integridad bou di presion.

            Prome, nos por a tuma nota cu Minister Cicilia ta firma un acuerdo cu Royal Schiphol Group pa nombra un CEO Hulandes y asina kita oportunidad di nos Rubiano, nos profesional, esun cu conoce nos isla, nos cultura, y sa kico ta come y bebe di turismo. Ora a pensa cu e lo por tin un poco remordimento di e mal decision aki, ta yega na nos oido cu Sr. Cicilia kier cambia e statuto di AAA N.V. Sr. Cicilia kier introduci un cambio preocupante esta e posibilidad pa nombra un miembro di hunta di Comisario (1) pa un periodo indefini y (2) sin limite di edad. Esaki ta bay directamente contra Good Corporate Governance y ta habri porta pa politisa un entidad cu ta clave pa nos desaroyo economico.

            Minister Cicilia no ta brinda e hunta ningun tipo di respet y ta hisa benta decision sin a reuni debidamente cu e hunta di directiva. Pues decisionnan crucial ta wordo tuma sin reunion of consulta cu e organo di supervision, algo cu tambe ta contra tur regla di transparencia y bon maneho. Ademas, ta parce cu Minister Cicilia, cu ta un hurista, no a tuma su tempo pa pasa door di e concepto di ley di Corporate Good Governance. E falta di consulta cu DWJZ, ausencia di motivacion den decisionnan, falta di transparencia cu Parlamento door di keda sin contesta pregunta y e insistencia pa entrega control na stranhero y na ‘un grupito’ sin consideracion pa nos profesionalnan local, ta refleha un direccion hopi preocupante pa nos pais y nos hendenan.

            Como pueblo, nos mester keda alerta. E structura di bon gobernacion ta existi pa proteha e interes general, pa preveni abuso di poder y pa stimula confiansa den nos institucionnan. Tur intento pa debilita esaki mester wordo cuestiona y rechasa. Mi ta haci un yamada na e Gobierno AVP-Futuro pa brinda transparencia y contesta e preguntanan nos di Fraccion MEP a haci pa preserva integridad y honra codigo di bon gobernacion.