Calidad di bida no a mehora na Aruba

Parlamentario Dangui Oduber

• Prijsnan ta sigui subi tur dia
• Costo di bida ta sigui pone presion riba famianan 

ORANJESTAD (AAN): Parlamentario Dangui Oduber a expresa su preocupacion profundo tocante e aumento acumula den diferente gastonan esencial di famianan na Aruba. Su declaracion ta basa riba cifranan oficial di e Indice di Prijs di Consumo (CPI) publica pa Central Bureau of Statistics (CBS), unda a compara e datonan di augustus 2024 cu augustus 2026.
   Aumento den sectornan clave: E comparacion entre e periodo di Gabinete Wever-Croes (augustus 2024) y Gabinete AVP-Futuro (augustus 2026) ta indica un subida considerabel den e gasto mensual di pueblo. E datonan aki ta ilustra con prijsnan di producto y servicionan esencial pa famianan na Aruba a subi di un forma explosivo. Entre e aumentonan mas destaca nos ta haya: (*) Diesel: +29.7%.  (*) Gasolin: +12.9%. (*) Bebida sin alcohol: +7.0%. (*) Mantencion y reparacion di cas: +4.9%. (*) Cuminda: +3.9%. (*) Huur di cas: +3.0%.
   Segun Oduber, e porcentahenan aki no ta simpel cifranan riba papel, sino un golpi directo den cartera di e ciudadano kende mester saca mas placa for di su salario mensual pa cubri e mesun necesidadnan basico manera alimento, vivienda y transporte.

   E pregunta importante ta: E salario y poder di compra di pueblo a crece suficiente pa compensa e aumentonan aki?

   Economia por a crece riba papel, pero prosperidad mester wordo sinti den cartera di pueblo y esey no ta e caso actualmente.  Tras di cada porcentahe di aumento tin un realidad amargo pa e famianan. Un famia no ta cumpra un cifra di inflacion: E ta cumpra cuminda, ta paga awa y coriente, ta yena su auto y ta paga huur of hipoteca.  Ora e gastonan aki ta subi, e presion riba e presupuesto ta bira mas grandi,” Oduber ta declara, subrayando cu e presion ey a bin ta subiendo luna tras luna bou di e Gabinete di AVP-Futuro.

   E poder di compra real:  Segun Oduber, e debate economico mester enfoca no solamente riba e resultado financiero di Gobierno, pero tambe riba poder di compra di ciudadano.  E pregunta central ta: Cuanto placa realmente ta resta den man di un famia despeus cu e paga su gastonan basico.  Den e contexto aki, e datonan di Central Bureau of Statistics (CBS) ta duna di conoce cu e bestaansminimum pa un famia di cuater persona na Aruba a registra un aumento di mas di 144 florin compara cu augustus 2025, alcansando un total di 5.663 florin pa luna na augustus 2026.

   Pa e motibo aki, Oduber ta considera importante pa Gobierno splica na pueblo cua ta e medidanan concreto cu lo wordo implementa pa atende e aumento di costo di bida, specialmente den sectornan clave manera cuminda, energia, transporte y vivienda.

  Conclusion: Economia por mustra cierto indicadornan positivo, pero e experiencia di e ciudadano ta totalmente diferente. Pa hopi hende e pregunta ta simpel: Mi salario ta alcansa pa cubri mi gastonan mensual? Na e momentonan aki, e contesta ta “No”!

   Publicacionnan di CBS ta duna rason na e ciudadano: inflacion a bolbe subi y e presion riba famianan a bira mas pisa.  Un economia cu no ta duna e ciudadano pa biba dignamente, ta un economia cu simpelmente no ta funcionando.