“Cada generacion di AVP tin su momento pero cu e mesun conviccion pa sigui lucha pa loke ta kere aden”

Marlon Pieters:

ORANJESTAD (AAN): Pa Marlon Pieters, AVP ta mucho mas cu un partido politico. Ta un parti di su propio historia: añanan di recuerdo, amistad, campaña, sacrificio y un sentimento di pertenencia cu a crece cu paso di tempo.

Su acercamento na partido a bin poco poco. Loke a cuminsa door di contacto cu persona cerca di dje, eventualmente a bira un compromiso cu lo hib’e den campaña y hacie parti di diferente momento importante den historia di AVP.

Ora Marlon ta bolbe pensa riba e añanan ey, e recuerdonan ta bin bek naturalmente. E ta corda un AVP caminda campaña tabata exigi hopi di su activistanan. No tabatin e facilidadnan di comunicacion cu tin awe. Tabata sali caya, pone borchi, papia cu hende, defende bo partido y sigui dilanti hasta ora campaña tabata duro.

Tabata un otro epoca, cu su propio reto, pero tambe cu un sentimiento fuerte di compañerismo.

“Campaña no tabata facil den e tempo ey,” Marlon ta recorda. Sinembargo, e activistanan tabata sigui. Pa nan, no tabata solamente cuestion di gana un eleccion. Tabatin conviccion, compromiso y e deseo pa mira nan partido logra su meta.

Un di e capitulonan cu a marca Marlon profundamente tabata e epoca di Henny Eman.

Den su recuerdo, Henny tabata un lider cu carisma, pero specialmente un persona cu tabatin vision. Marlon ta papia cu admiracion di e manera cu Henny por a mira oportunidad pa Aruba y pensa riba futuro di nos isla, entre otro den desaroyo di turismo.

Pa un activista hoben den e tempo ey, tabata inspirador pa forma parti di un esfuerso cu tabatin un direccion y un meta cla.

Pero politica, manera bida, nunca ta para keto.

Añanan a pasa. Aruba a cambia. Partido a cambia. Y un otro generacion a cuminsa carga mas responsabilidad.

Cu Mike Eman, Marlon a presencia un siguiente etapa den historia di AVP. Un otro personalidad, un otro estilo di liderazgo y un partido cu mester a adapta un biaha mas na realidad di su tempo.

Pa Marlon, esey ta algo natural.

Despues di tanto aña den partido, el a siña cu cada generacion ta trece algo diferente. Cada lider tin su manera di inspira, cada activista tin su propio experiencia y cada epoca ta exigi otro contesta.

Cada generacion tin su momento.

Y precisamente p’esey, Marlon tampoco ta kere cu un partido fuerte ta uno caminda tur hende mester pensa exactamente mescos.

Durante su entrevista el ta bolbe diferente biaha riba importancia di papia cu otro, expresa opinion y sinta hunto. Den un partido grandi semper lo tin diferente pensamento, diferente personalidad y diferente manera di mira e caminda dilanti.

E reto ta loke pasa despues.

Pa Marlon, bo mester por scucha otro, hasta ora bo no ta completamente di acuerdo. Bo mester por defende bo posicion, pero tambe ta abierto pa tende otro. Y finalmente, ora diferencia ta grandi, sinta hunto y busca consenso.

Esey tambe ta parti di e experiencia cu añanan den politica y campaña a dune.

Awor, despues di a presencia diferente etapa den historia di AVP, Marlon ta para dilanti di un otro momento di cambio.

Dia 4 di october, AVP lo reuni pa su Congreso 2026, Era di Relevo.

Pa un activista cu a conoce partido den diferente epoca, e palabra relevo tin un significado special. Pasobra e mes a mira con un generacion ta entrega responsabilidad na otro, con estilo ta cambia y con cara nobo ta aparece, mientras e historia di partido ta sigui.

Awo ta un otro generacion cu ta preparando pa pone su propio seyo. Pero pa Marlon, relevo no mester significa distancia di loke a pasa. Al contrario. Relevo ta reconoce e caminda cu otro a habri. Ta carga e experiencia cu nan a laga atras, siña for di nan experticio y nan reto, y despues tin e curashi pa sigui construi.

E activistanan cu un tempo tabata sali caya cu nan borchi y pasa ora den campaña ta parti di e historia ey. E lidernan cu a guia partido den diferente momento ta parti di dje. Y tambe e generacion cu awe ta para cla pa asumi mas responsabilidad lo agrega su propio capitulo.

Esey ta loke ta haci e momento actual special.

Pa Marlon Pieters, despues di tanto campaña, tanto cambio y tanto recuerdo, compromiso cu AVP no ta algo cu simplemente a keda den pasado. E ta algo cu ainda e ta carga cu ne.

Y ora e mira e siguiente generacion para dilanti, e ta mira oportunidad pa partido sigui evoluciona, pero semper cu espacio pa dialogo, participacion y union.

Un generacion a habri caminda. Otro a sigui construie. Awor un generacion nobo ta prepara pa carga e siguiente responsabilidad.

E caranan por cambia. E manera di haci campaña por cambia. E retonan di Aruba por cambia. Pero e historia cu ta conecta un generacion cu otro, ta sigui.

Congreso 2026. Un momento pa honra e historia cu a forma nos, reconoce esnan cu a carga e caminda y mira cu confiansa na e siguiente capitulo.