Parlamentario Arthur Vallejo ta conseha Minister:
*Y wak si esaki ta un proyecto digno di acepta!
ORANJESTAD (AAN) — Den conferencia di prensa di fraccion di MEP, parlamentario Arthur Vallejo, a toca e tema di e proyecto di renovacion y ampliacion di Hospital dr. Horacio Oduber, unda cu el a cuestiona cu e contratista a abandona e proyecto, despues di a cobra nos pais hopi placa, y cu por considera como ladronicia na grandi.
Vallejo a sigui expresa: “Esaki ta e resultado, pueblo di Aruba, esaki ta e resultado! Pero esaki ta pasado cu ta importante pa recorda pueblo. Tambe ta mes importante, kico mester wordo haci pa futuro y con nos mester bay proteha pueblo di Aruba di un di e catastrofenan mas grandi den salud, pa pueblo di Aruba”, e parlamentario a remarca.
Vallejo tin un conseho pa Minister di Salubridad. El a scucha cu e proyecto mester a wordo entrega pa final di e aña aki, pero cu awor a alarga kizas pa e aña siguiente.
“Pa Minister di Salubridad ta importante pa ora nan yame pa ricibi e famoso yabi, y pa bay saca potret, sigur; pa no bay haci esaki asina lihe. Mi ta kere cu pa respet pa pueblo, ta importante pa warda un rato prome, pasobra prome cu esaki mester haci algo hopi importante. Loke mi ta conseha Minister di Salubridad y cu mester wordo haci den prome instancia, incluso mi lo a cuminza busca di awo caba, fondo pa un di tres partido evaluado, cu no tin nada di haber cu ningun di e stakeholders cu a realiza e proyecto aki, y cu lo bay evalua e condicion di e edificionan”, Arthur Vallejo ta propone.
Ademas, pa bisa den un rapport si di berdad e materialnan y e construccion ta bay wanta, y dura un tempo razonable. Y tur esaki den interes di nos pueblo. Den interes nacional.
“Pasobra ami, a scucha y ta sigui scucha diariamente, con dak ta cay den otro, problema cu inundacion pasobra tubo ta rementa, vloer di O.K (sala di operacion) no ta leveled (nivela) y pesey e mashinnan no ta move, holo di diesel y un cantidad mas di cosnan cu ta di interes nacional”, Vallejo a subraya.
El a reitera pa e minister bin cu un grupo evaluado pa wak si esaki ta un proyecto digno di acepta. Esaki ta algo cu e parlamentario ta sinti cu Minister di Salud no por faya pueblo di Aruba den esaki, pasobra lo ta sumamente doloroso pa scucha cu den diez aña of menos, lo mester bolbe renova HOH di nobo pasobra materialnan no ta wanta, of ta deteriora di tal manera cu e lo bay costa pueblo di Aruba, pagador di belasting, miyones atrobe pa renova un proyecto cu no a ni paga of kizas cuminza, na paga ainda.
