Parlamentario Arthur Vallejo:
- Ehecuta pa e ladronnan mas grandi cu Aruba a conoce
ORANJESTAD (AAN) – Parlamentario Arthur Vallejo a referi na Hospital Horacio Oduber (HOH), den conferencia di prensa reciente, di fraccion di MEP.
E parlamentario a bisa cu pueblo a wordo informa pa e directivanan di HOH, di un situacion cu henter pueblo di Aruba ta bin ta presencia cu hopi dolor.
“E ta e dificultad enorme cu nos ta pasando aden cu nos hospital dr. Horacio Oduber y su proyecto di ampliacion y renovacion. Awo nos a bin haya sa cu e contratista a abandona e proyecto. E cantidad di placa cu pueblo di Aruba ta bay paga pa un renovacion di un mega hospital cu ta HOH, pa e proximo 29 añanan pueblo di Aruba mester bay paga e proyecto aki, y cu interes di e financiamentonan, sigur, cada un di nos aki na Aruba lo mester paga cerca di un billion florin pa e proyecto aki. Esaki ta doloroso, pasobra cu e placa aki pueblo di Aruba por a laga traha dos hospital completamente nobo, cu tur ekipo aden”, Parlamentario Vallejo a señala.
El a agrega cu esaki ta un proyecto ehecuta pa e ladronnan di mas grandi cu e pais aki, a conoce. E fracaso y e complicacion di con e proyecto aki ta hinca den otro, y tur loke a sosode den e transcurso, ta tipico di personanan cu mentalidad, cu definitivamente no tabata tin e interes di pueblo na prome lugar. “Parce cu sed pa placa tabata na prome lugar pa e proyecto aki, y bo ta wak’e for di su comienzo cu e otorgamento y proceso di bidding, siendo cu tabata tin un grupo cu mas experiencia y menor costo, pero toch a scoge pa uno sin experiencia y mas costoso”, e parlamentario a remarca. Den otro articulo DIARIO ta elabora mas riba locual Parlamentario Vallejo a trece dilanti.
