ORANJESTAD (AAN): Partido MEP a tuma nota cu Parlamentario Mike Eman den su disertacion den Parlamento pa trata Presupuesto 2022,
atrobe ta recuri na e política anticua di pobresa. Un biaha mas e ex lider di nos pais ta trata na crea e impresion cu maneho di e gobierno aki ta e motibo principal di dicho pobresa. Señor Eman tabata y mester ta na haltura cu awe nos ta bibando e resultado di su maneho devastador pa Pais Aruba.
Awe atrobe nos por a scucha con señor Eman ta purba pinta un situacion sin trece solucion como un ciudadano di nos pais. Señor Eman ta pinta un situacion sin mustra un vision pa pais Aruba. Cu otro palabra, si señor Eman tabata na mando awe, lo ta un continuacion di e maneho devastador cu e la hiba pa pais Aruba.
Durante su gobernacion tabata bon cla, cu e hecho el a endeuda pais Aruba, lo tin su consecuencianan pa nos tur aki riba Aruba. Esaki señor Eman tabata sa pasobra el a ser poni na haltura di esaki door di instancianan local e internacional. Pero señor Eman a scoge pa encamina e caminda di endeuda futuro generacionnan. Den 8 aña di gobernacion señor Eman a redobla debe di un pais cu desde 1986 a sa di mantene un situacion manehabel financieramente.
Tur instancia internacional cu señor Eman a papia cu nan, a indica cu na momento cu bo deficitnan presupuestario bay for di man, esaki lo afecta economia riba termino mediano. Esaki ta locual a pasa tambe bou gabinete di Eman cu a alcansa deficitnan di 400 miyon florin. Esaki lo reduci e spaarmento nacional y lo traha contraproductivo pa e sector priva. Esaki ta un realidad cu señor Eman tabata sa di dje.
Mas leu ainda, señor Eman tabata na haltura cu deficitnan halto manera el a scoge pe, lo afecta crecemento economico, stabilidad den prijsnan, costo di produccion y inflacion. Sin kita afo cu esaki lo afecta tambe e rating di pais Aruba cual por haci yegada na capital mas difícil. Esaki ta scogencia consciente di señor Eman pa cu futuro generacionnan di pais Aruba.
Resultado di esaki ta cu Hulanda a interveni den maneho di país Aruba na 2015. Motibo di esaki ta cu tabata visto cu tin un líder den e pais aki cu no tabata interesa den su pais y conscientemente tabata hibando e pais den un situacion tecnicamente failliet.
Awe e mesun lider tin e pudor di para papia den e cas di pueblo, di maneho di pais Aruba y e dolor cu e pueblo ta sinti cual ta resultado di su propio maneho. Tempo a siña Aruba tambe, cu debi na e posicion zwak cu pais Aruba a ser laga aden, no tabata por a sobrevivi un pandemia si no tabata pa sosten den Reino. Si señor Eman a hiba un maneho financiero prudente, kisas lo tabatin necesidad di menos sosten di afo y pais Aruba lo tabata tin mas di bisa.
Awe cu ken cu nos papia tin e mesun opinion. Pueblo di Aruba sa bon, cu redoblacion di debe di un pais y hinca un pais den debe astronomico, tin su consecuencianan. Y awe nos ta bibando esaki pasobra e pais aki no tin e fundeshi financiero fuerte pa por wanta shocknan exerno. Mike Eman y su gobierno a hinca Aruba den e situacion aki. Mike Eman ta e causante di e situacion cu nos pueblo ta den aworaki. Y ni con e purba troce e berdad aki, pueblo ya no ta kere den dje mas. Pasobra Mike Eman ta keda sin vision pa soluciona e problema cu e mes a causa.
Awo Aruba ta conta cu un Gobierno drechi. Un Gobierno cu a cuminsa encamina e camina di progreso y bienestar despues di a hereda un situacion economico, financiero y social hopi devastador. Un Gobierno cu awe, nos por papia di recuperacion despues di un pandemia cu a azota nos pais. Un Gobierno unda cu awe nos por papia di inversion y oportunidad pa cada ciudadano.
