Wever-Croes riba pakico no ta forma gobierno cu AVP - ORANJESTAD (AAN): Evelyn Wever-Croes, Lider di Partido MEP, a reuni cu Gobernador Alfonso Boekhoudt dialuna atardi. El a atende cu prensa unda el a splica e pakico MEP no por traha hunto cu AVP den e formacion di un gobierno nobo.
"Ami no ta kere pueblo ta pidi esey. Mi ta kere cu nos di partido MEP en todo caso ta hopi honesto den esaki y nos a splica cu partido AVP ta para pa principionan cu nos no ta para p'e. Nan ta para pa principionan caminda nan ta embrace corupcion y nos kier combati corupcion.
Nan a embrace e candidatura di un hende cu ta cera den prison aworaki, lag'e riba lista. Wak no ta un cos cu a pasa cu bo despues cu bo a entrega lista. Ta un cos cu bo tabata sa cu ta bay pasa. Anto toch, nan no solamente a lag'e, pero nan a bay defende y nan a bay purba propagand'e pakico hende mester vota p'e", a expresa.
Wever-Croes a agrega cu esey ta cosnan cu pa partido MEP ta un berguensa y cu como arubiano e ta haya un berguensa.
E punto di salida di AVP ta pa ataca institutonan importante manera Ministerio Publico y Landsrecherche. Y nan ta bisa cu ora cu nan ta haya chens nan ta bay desmantela nan. Tin algun aspecto cu ta principal y cu nan a trece pa dilanti cu ta pone cu pa MEP ta bira sumamente dificil pa contempla AVP como un partner.
El a señala cu den un democracia mester tin balans y ora no tin oposicion grandi no tin balans. Siendo cu si tin un partido grandi den gobierno y otro mas chikito of mediano den oposicion e ta trece balans y esey ta sigura democracia.
Wever-Croes a enfatisa cu e no ta kere cu e problemanan di Aruba ta wordo soluciona si MEP y AVP ta traha cu otro. E problemanan di Aruba ta wordo soluciona si tin gobernantenan cu tur ta wak den e mesun direccion.
"Ken sa, por ta den futuro, AVP ta para pa principionan cu ta sincronisa, alinea cu esunnan di nos cu nos no ta bay tin e problema. Aworaki e problema ta grandi", e lider di MEP a declara.
