Parlamentario Marco Berlis (MEP):
ORANJESTAD (AAN): Mundo henter ta observando di cerca e desaroyonan desastroso di e guera cu Rusia a cuminsa encontra di Ukraine algun siman pasa. E guera aki a causa instabilidad y preocupacion global den diferente area. Un di e desaroyonan negativo aki ta e aumento den e prijs di e bari di petroleo.
E subida di petroleo ta subi e inflacion local y global grandemente ya cu transport, produccion di energia y producto ta subi considerablemente cu e aumento aki. E desaroyo aki sigur no ta faborece nos pais cu na e momentonan aki ta pasando den un crisis severo causa pa e megadebe cu sr. Eman a laga atras pa nos tur paga 90 miyon Florin anualmente te cu 2049.
Ademas e pandemia a haci cu pais Aruba mester a cera su fronteranan y nos economia a colapsa grandemente lagando pais cu un deficiencia di entrada di cientos di miyones, cual nos mester a bay presta na Hulanda pa mantene pais y pueblo na bida economicamente. Nos tur ta corda bon cla con decisionnan dificil a worde tuma e tempo ey pa salvaguardia salud di nos pueblo contra un virus cu a terorisa mundo henter.
Ta enbista di e crisis aki mi a sugeri pa sondea e posibilidad pa bin cu un calidad di gasolin na un mihor prijs. E beneficio di esaki ta cu pueblo e ora lo por scoge cual tipo di gasolin e ta desea pa usa y asina tambe por tin e poder pa resta mas placa di su presupuesto personal pa otro gastonan personal. Tambe e mocion ta sugeri pa sondea e posibilidad pa wak si e stacionnan di gasolin tin e capacidad di pone un tanki mas den suela pa acomoda e gasolin diferente aki.
Pueblo por conta cu mi, cu apesar cu mi ta parlamentario di nos pais, mi ta sigui sondea y pensa riba posibel solucionnan. Aruba mester di plannan cu tin e poder pa sigui impulsa y fortalece nos pais. Aruba ta di nos tur y hunto nos por logra recupera nos economia y nos pais!
Lamentablemente un biaha mas e fraccion di AVP, cu ta grita dia y nochi cu alma y cuerpo riba caya, den rueda di prensa, cu nan kier wak Aruba sali for di pobreza, cu nan ta luchando pa pueblo, a vota CONTRA di e mocion importante aki. Lo ta bon pa simpatisantenan y pueblo en general puntra sr. Mike Eman pakico a vota CONTRA mocion 4 y wak si su splicacion ta satisface bo!
E hipocresia constante di sr. Mike Eman ta cu enberdad e kier sigui sembra chaos, y discordia, bisa nada ta bon y no ta aporta na solucion berdadero y concreto tampoco. Tur hende conoce AVP su situacion bergonsoso di mentira y corupcion. Mike Eman no ta preocupa si pueblo ta sufri pa via cu e y su fraccion a vota CONTRA di un solucion pa e pueblo di Aruba.
E votonan anti-Arubano aki ta bon documenta y publica na varios ocasion den e medionan social. Sr. Mike Eman lo haci cualkier cos basta nan por drenta gobernacion atrobe! Si esey kiermen perhudica Aruba y purba stop gasoline mas barata yega Mercado di Aruba, Mike Eman a haci’e caba!
Pesey enbes di yuda empodera e pueblo financieramente, un biaha mas nos por wak cu AVP y Mike Eman su accionnan ta papia hopi mas cla cu nan hopi mentiranan!
