Partido RAIZ ta insisti:
ORANJESTAD (AAN) Ursell Arends, lider di Partido Raiz ta comparti cu DIARIO e siguiente relato tocante nan punto di bista encuanto e Ley di Hulanda, Rijkswet HOFA.
“A bira momento pa nos politiconan ‘walk the talk’. Manera ex-minister di Finanzas Sr. Angel Bermudez a yega di declara: ‘Bisa locual bo ta bay haci y haci locual bo a bisa’. Autonomia no ta algo pa warda den cashi. Nos como Aruba ta haci uso di nos autonomia na momento cu Aruba determina su rumbo. Aruba como pais autonomo y soberano ta scoge su meta y ta traha su plan. Manera nos caba di paga Hulanda, nos ta sali for di e rijkswet HOFA.
“Na e momentonan aki, Aruba ta enfrentando un decision crucial, un decision cu tin tur hende pendiente y esey ta draai rond di Rijkswet HOFA, cu awe Dialuna 10 di November lo wordo trata den Parlamento. Por mira cu tin un campaña fuerte ta wordo hiba y maske cu Halloween a pasa caba, e fantasma ta poni pa sigui spanta e comunidad cu algo cu kizas no ta wordo bon comprendi asina causando division: HOFA.
Mirando tur e discusion y division cu ta tumando lugar den nos comunidad riba e tema aki, nos di partido RAIZ kier a, publicamente trece nos posicion riba e tema di rijkswet dilanti pa mas hende por compronde. E tratamento di e rijkswet HOFA, pa yega na un acuerdo cu Hulanda pa paga bek e mas di 1 biyon florin (mil miyon florin) cu Aruba ta debe Hulanda, mester ta pa nos tur un momento di reflexion.
Separa di tur e discusionnan politico cu a bin ta tuma lugar durante e ultimo lunanan y maske ta pa un rato, ban pone un banda e debate politico y ban pensa riba kico a trece nos na e punto crucial aki. Ban compronde bon, pakico nos mester bin hunto como pais y pakico nos mester traha hunto pa haci uso di nos autonomia pa yega na un solucion, cu ta brinda nos pais e oportunidad pa alcanza finanzas publico sostenibel y duradero cu lo impacta, positivamente, nos calidad di bida y esun di nos proximo generacion”, Lider di Partido RAIZ ta señala.
Hulanda kier kita nos autonomia of no: “Tur dia nos por scucha nan papia cu Hulanda kier kita nos autonomia. E ponencia aki ta absurdo. Nan kier traha riba emocion di hende y e amor cu nos tur tin pa Aruba. Pero e berdad ta otro. Awe, nos como pais ta debe Hulanda mas cu 1 biyon florin. Mescos cu hende cu tin hipoteca, aworaki Hulanda tin hipoteca riba nos isla. Un hipoteca cu ta hopi duro pa nos paga bek. Nan por scoge pa manda un avalanche di instruccion y tarea (opdracht) y tur tipo di medida (maatregel) pa forsa Aruba paga y na momento cu nos no cumpli, nan por kita tur sombra di autonomia for di nos. Eynan nos ta” Arends ta subraya.
“Pero Hulanda no ta haci esey. Via HOFA nan ta propone diferente areglo financiero cu ta duna Aruba flexibilidad pa por paga bek na un forma responsabel. Nan ta pone placa barata disponible pa asina nos por yuda nos mes. Algun politico den oposicion ta papia den Parlamento di un ‘sakito di placa’. Kizas pa nan 40 – 50 miyon florin pa aña na placa barata ta un ‘sakito di placa’. Pero esaki ta net e placa cu nos mester pa yuda nos adultonan mayor y tur resto di nos comunidad cu a cay den pobresa of no por alcanza na biba un bida digno pasobra politiconan a abusa di autonomia den pasado. No spanta pa e fantasma cu Hulanda kier nos autonomia. Awe cu tanto debe, Hulanda por kita tur cos di nos. Pero nan no ta haci esey. Lo cual Hulanda ta ofrece ta placa barata y a cambio loke nan ta pidi ta un garantia cu Aruba lo cumpli”, Ursell Arends, lider di Partido RAIZ a enfatiza.
