Otmar Oduber di PPA:
ORANJESTAD (AAN): Durante un conferencia di prensa, Otmar Oduber di Partido PPA a mustra cu no tin duda cu e discusion riba Rijkswet a comberti den un teatro politico, unda cu cada actor ta sali conta loke ta combini nan y no e berdad.
Segun Oduber, esaki no por sigui asina y mester atende e asunto di Rijkswet cu hopi mas seriedad y sinceridad. Algo cu niun partido ainda no a haci, ya cu MEP ta culpa AVP y Futuro y vice versa, mientras Aruba ta sigui un rumbo di entrega, cu ta crucial pa su autonomia, autodeterminacion y Futuro. Ta ora pa pone e berdad riba mesa y mira ken ta defende pueblo y ken ta defende beneficio politico of di partido.
Importancia na Rijkswet: For di un principio partido AVP a mustra di tin un division den nan posicion di Rijkswet: un rato nan ta pro, un rato ta contra. Mientras cu te den periodo di campaña, ainda e lider, Mike Eman, a bisa na varios ocacion, cu e ta contra Rijkswet.
Sinembargo partido Futuro semper a indica di ta na fabor, sin cuestiona e consecuencia y ta cla pa bisa si na cualkier forma di Rijkswet, contal cu nan haya placa. Ta partido PPA so, cu for di su comienso como Plataforma Pais, a pone y indica su posicion cla y raspa: contra di cualkier tipo di Rijkswet, cu ta mina Aruba su autonomia y autodeterminacion.
Wega di poder: “Premirando un situacion, partido PPA ya for di 30 di januari a manda un peticion pa tin un Reunion Publico riba e topico crucial aki di Rijkswet. Sinembargo, mester a warda shete luna pa esey por tuma lugar. Y ora finalmente e reunion a cuminsa, despues di algun minuut partido AVP ta pidi pa un schorsing di dos siman.
Pero pio ta, cu Presidente di Parlamento ta duna okay na e peticion aki, mientras partido AVP no ta esun cu a pidi e reunion”, Oduber a expresa. Esaki ta muestra cla cu poder y partido ta prevalece riba interes nacional. Awe, tres siman despues, ainda Presidente di Parlamento no a yama e reunion aki back, mientras henter Aruba ta papiando di Rijkswet. Y pa completa, tin un delegacion di parlamento ta preparando pa bay IPKO na Den Haag, sin cu e asunto ta trata den su propio Parlamento y reunion cu ken? Un gobierno y parlamento demisionario?
Dos opcion: Rijkswet por ta bunita y bon riba papel, pero ta contra nos derecho constitucional y autodeterminacion. “Aruba a lucha hopi aña pa preserva su autonomia y nos no por laga un Rijkswet pone esey na peliger. Si tin cu paga nos debe, nos por haci esey como un pais responsabel: e suma di debe cu Hulanda ta menos cu 0.5% di nos presupuesto. Esaki kiermen un recorte di 8-10 miyon Florin pa nos mes por cubri esey. Esaki ta un cuestion di dignidad y soberania,” Otmar a expresa. Aruba ya a yega di haci algo asina cu e proyectonan di hospital y PPA, pues ta algo cu sigur lo por haci.
Segun Oduber a sigui bisa, “E di dos opcion ta un alternativa hopi practico tambe. E begrotingskamer nos ta ancr’e den nos constitucion, unda cu mester di un mayoria absolute di 15 voto pa haci cambio of adaptacion. Di e forma aki Hulanda por haya garantia cu Aruba tin disciplina financiero y fiscal y Aruba ta keda doño di su propio decisionnan.” Esaki sigur ta un rumbo cu ta defende nos constitucion y autonomia, sin tin mester di entrega door di presion.
Pa conclui Otmar Oduber a enfatisa cu pais Aruba ta na un punto crucial. E pregunta no ta si nos ta na fabor of contra un persona of partido, sino si nos ta dispuesto pa defende nos autonomia, nos autodeterminacion, e lucha largo di nos antepasadonan, paga nos propio obligacionnan y keda como un pais cu dignidad. E ora a yega pa pone Aruba na prome lugar y stop di culpa otro.
