Marco Berlis (MEP):
ORANJESTAD (AAN): Marco Berlis (MEP) ta presenta un analisis critico riba e prome siman di Gabinete Eman-III. Pa pueblo compronde e situacion actual, mester refleha riba e politica di AVP y Futuro 2023-2025 compara cu nan actitud den oposicion.
Tempo cu AVP tabata den oposicion, nan a exigi pa Gabinete Wever-Croes cumpli cu tur exigencia di CAft durante pandemia, incluyendo e surplus. Na 2023, gobierno a logra e surplus, pero sorpresivamente AVP y Gerlien a cuminsa ataca e logro aki, tratando di demonisa loke tabata un avance importante pa Aruba - un surplus cu ta crea espacio financiero pa duna bek na pueblo y haci inversionnan.
Loke ta creando disgusto y confusion den comunidad, ta cu apesar di hereda un surplus di 488 miyon florin na 2024, e gobierno nobo a dicidi di implementa varios medida di austeridad. Ora cu nan a trata e presupuesto 2025 den Parlamento, nan a presenta un nota di cambio cu ta corta drasticamente den departamentonan cu ta duna servicio esencial na comunidad.
E contradiccionnan entre promesa y accion ta notabel:
- E prome accion di Minister di Finanzas y Economia; A promete mehora poder di compra
durante campaña, pero a hisa prijs di gas cu 30-35%.
- A bisa cu lo yuda e homber chikito, pero a corta 6.2 miyon florin di subsidio na sector social y
husticia.
- A promete mehoracion di educacion, pero a kita 2.9 miyon for di e departamento di educacion.
- A bisa lo reduci gasto di bureau ministerial cu 8.5 miyon, pero a elimina e plan aki
Completamente for di presupuesto 2025.
- Despues di critica e gobierno anterior pa 7 aña riba e tema di abuso di mucha, e gobierno nobo
mes a corta 3 miyon di subsidio pa fundacionnan cu ta combati abuso di mucha y salud
mental.
- A priminti mehoracion di condicion di bida, pero a corta 20 miyon di FCCA, poniendo 150-
200 cas social na peliger y posiblemente causando aumento di huur.
- Mike Eman a priminti bahamento di belasting, pero a anuncia aumento di belasting pa e sector
hotelero, locual lo haci nos turismo mas costoso.
E surplus cu Gabinete Wever-Croes a logra tabata importante pa varios motibo:
- E ta facilita inversion den proyectonan di infrastructura.
- E por wordo usa pa duna diferente tipo di "toeslag" na comunidad manera energie toeslag,
creche toeslag y reparatie toeslag.
- E ta yuda baha e debe nacional drasticamente y cumpli cu normanan di CAft.
- E ta demostra un maneho financiero efectivo.
- E surplus a convence Hulanda pa reconsidera e RAFT y traha riba un rijkswet nobo cu por ta
mas beneficioso pa Aruba.
E analisis aki ta sugeri cu, apesar di hereda un situacion financiero favorabel, Gabinete Eman-III a scohe pa tuma medidanan cu por tin consecuencianan negativo pa pueblo, specialmente esnan mas vulnerabel. E contradiccion entre e promesanan di campaña y e accionnan tuma den e prome siman di gobernacion ta genera preocupacion y inkietud den comunidad tocante e direccion cu e gobierno nobo ta tumando.
