Lider di fraccion di PPA, Otmar Oduber:
ORANJESTAD (AAN): Dialuna PPA a bolbe entrega un amienda den e tratamento di Presupuesto Supletorio, pa por pone 5 miyon florin na e 10 Centronan di Bario rond di Aruba.
Den un encuentro cu e Centronan di Bario, PPA a scucha nan necesidadnan y p’esey a opta pa no laga nan afor den un momento cu gobierno tin e posibilidad pa inverti den pueblo di Aruba.
“E Centronan di Bario ta e punto central caminda miles y miles di mucha, hoben, adulto y adultonan mayor ta topa otro y recrea pa por sigui hiba e pueblo di Aruba padilanti” Otmar Oduber, como lider di fraccion di PPA a bisa.
Otmar a sigui bisa: “Nos tur como Parlamentarionan ta biba den un bario y nos mester reconoce e echo cu e boluntarionan den cada Centro di Bario ta traha cu alma y cuerpo pa desaryo di nos comunidad. Ta p’esey fraccion di PPA ta boga pa gobierno inverti den e Centronan di Bario.”
Inversion di 10 miyon pa cuida y controla nos frontera
Den PPA su amienda tin destina 10 miyon di florin pa cuida y controla nos frontera. Segun e cifranan actual, Aruba ta considera como un di e paisnan mas sigur di Caribe. Como fraccion di PPA nos mester mantene esaki. Inverti den proteccion di nos frontera ta netamente pa nos proteha nos ciudadanonan di e hendenan cu kier comete maldad riba e pida baranca aki.
Pa preveni cu e hendenan ta sigui purba drenta Aruba ilegalmente, cu e idea cu nan lo por haya un status legal awor cu e maneho flexibel. Di e manera aki nan por contribui legalmente den nos sector priva. E inversion aki ta necesario y ta agilisa e trabounan di control di nos frontera.
11 miyon na Cuerpo Policial di Aruba y KIA
Fraccion di PPA den su amienda tambe ta boga pa inverti den aumento di personal den forma di agente di Cuerpo Policial Aruba (KPA) y baha e presion cu nos agentenan actual tin. E situacion unda e polisnan tin cu traha overtime, no ta nada beneficioso pa nan salud y por influencia nan prestacion na pia di trabou.
Ademas, tambe PPA ta boga pa inverti den personal pa CPA tin un psicologo riba payroll, pa yuda cu e demanda na cuido mental di nos agentenan policial. “Cu otro palabra inverti den e ser humano cu ta forma parti di CPA, pa nan por efectua nan trabou mas mihor ainda. Banda di pone placa disponibel pa personal, inverti placa den body-cams y dash-cams pa duna e agentenan e medionan necesario pa haci nan trabou mas mihor posibel y pa pueblo tambe por tin e trankilidad y haya e confiansa bek riba CPA”, Otmar a subraya.
Inversion pa mantencion di KIA
Mirando e trabounan di mantencion necesario na e edificio di KIA, fraccion di PPA ta haya importante pa inverti adicionalmente Afl. 500.000 florin. Ademas ta deseabel pa reserva fondonan di Afl. 500.000 pa financia e programanan di training y resocialisacion pa e presonan, cu e meta pa promove nan reintegracion den sociedad.
Ora tin surplus y gobierno ta busca caminda pa gasta, fraccion di PPA ta pone prioridad cla: comunidad, seguridad y husticia. Nos Centronan di Bario no por keda den olvido, nos frontera no por keda vulnerabel y nos polis y KIA no por keda sin apoyo. Pueblo tin derecho pa exigi cu placa publico ta uza pa bienestar publico, no pa interes chikito. PPA ta lanta den Parlamento pa recorda cu liderazgo ta, ora bo ta mustr’e den accion concreto y inversion pa pueblo mes.
