𝐀 𝐛𝐚𝐬𝐞 𝐝𝐢 𝐤𝐢𝐜𝐨 𝐀𝐓𝐈𝐀 𝐭𝐚 𝐜𝐨𝐧𝐜𝐥𝐮𝐢 𝐜𝐮 𝐑𝐢𝐣𝐤𝐬𝐰𝐞𝐭 𝐭𝐚 𝐛𝐞𝐧𝐞𝐟𝐢𝐜𝐢𝐨𝐬𝐨 𝐩𝐚 𝐀𝐫𝐮𝐛𝐚?

𝐏𝐚𝐫𝐥𝐚𝐦𝐞𝐧𝐭𝐚𝐫𝐢𝐨 𝐑𝐨𝐜𝐜𝐨 𝐓𝐣𝐨𝐧:

ORANJESTAD (AAN): E declaracion recien di Aruba Trade & Industry Association (ATIA), representa pa señor Henriquez, den cual e organisacion a yama e Consensus Rijkswet Hofa “𝑝𝑜𝑠𝑖𝑡𝑖𝑣𝑜 𝑝𝑎 𝐴𝑟𝑢𝑏𝑎”, ta lanta duda tocante e base y e fundamento real di e expresion aki.

Segun ATIA, e Consensus Rijkswet lo ta un paso positivo pa Aruba, entre otro pa motibo cu Aruba lo por cumpli miho cu su obligacionnan financiero. Sinembargo, esaki ta un argumentacion meramente subhetivo y ta contradeci e informacion y analisisnan obhetivo di diferente fuente independiente.

Tanto e rapport di IMF como e rapport di CAft ta indica claramente cu e situacion financiero di Aruba a mehora significativamente durante e añanan tras di lomba. Tambe e proyecionnan presenta pa minister Geoffrey Wever mes ta mustra cu Aruba lo logra surplus te cu 2030 y cu e debe nacional na 2040 lo ta bou di 50% si sigui cu un maneho financiero responsabel manera a bin ta haci ultimo añanan.

Loke ta haci e situacion ainda mas straño ta cu señor Henriquez a asisti diferente presentacionnan den cual profesornan y expertonan independiente a presenta analisisnan huridico, economico y financiero cu ta mustra e riesgo y desbentahanan cu e Rijkswet HOFA tin pa Aruba. Diestres (13) sindicato a expresa den un carta largo y bon argumenta pakico Consensus Rijkswet HOFA no ta beneficioso pa pueblo. Sinembargo, ATIA ta opina completamente diferente.

E contraste den e manera cu e sindicato nan a traha y e manera cu ATIA a traha ta hopi bisto. Mientras cu e sindicato nan a argumenta nan opinion riba cifra verificabel, asesoramento huridico y input academico, e posicion di ATIA ta parce di ta basa mas riba speculacion cu riba dato concreto. Diferencia di opinion ta sano, pero forma argumentonan y sostene decisionnan basa riba nada ta un peliger pa Aruba.
Den cuadro di esaki e ora e preguntanan na ATIA ta bira:

1. Dicon ATIA ta desvia di e posicion di 13 sindicato, cu a base di argumento huridico, economico y financiero a yega na e conclusion cu e Rijkswet HOFA no ta beneficioso pa Aruba?;
   
   
2. Riba ki conseho, analisis of rapport independiente ATIA ta basa su posicion?;
   
   
3. ATIA por comparti cu pueblo e documentonan cu ta sostene boso posicion pa cu e Consensus Rijkswet HOFA?
   
   Parlamento Tjon ta haci un yamada na señor Henriquez y na ATIA pa nan ta transparente tocante e fuente, analisis y cualke tipo di conseho cu nan a uza pa forma e opinion aki. Den un momento crucial pa e autonomia, economia y futuro di Aruba, pueblo Arubiano merece claridad y sinceridad, no interpretacionnan politico of personal!