Wardacosta a los tiro riba speedboat yena cu droga

Accion riba lama recientemente

ORANJESTAD (AAN): Siman nobo a habri, cu e informe suministra door di Wardacosta di Caribe Hulandes, relaciona cu un accion riba lama den cercania di Islanan ABC, cu a socede poco mas di dos siman pasa, esta riba Diadomingo 24 di November 2024.

   E barco Zr.Ms. Holland nabegando den Lama Caribe pa Wardacosta di Caribe Hulandes, a logra intercepta un cargamento grandi di droga.  Nan a confisca 511 kilo di cocaina cu tabata moviendo riba lama den un speedboat tipo Go-Fast.

   Esaki a bira e di siete captura di droga cu e barco di Marina Hulandes aki a logra intercepta den Lama Caribe.

   Con a detecta: Tur cos a cuminza ora cu e avion maritimo di patruya di Wardacosta a detecta e speedboat sospechoso aki moviendo riba Lama Caribe.  Mesora e barco Zr.Ms. Holland a drenta den accion, y a cuminza tuma rumbo pa e speedboat sospechoso.  Yegando mas cerca, nan a baha nan botonan di intercepcion rapido, esta varios FRISC, cu abordo e Fleet Marine Squadron, y un Team Maritimo Legal di US Coast Guard.

   Nan a yega hopi rapido cerca di e speedboat, y ora cu e cuatro tripulantenan ey a mira cu autoridad ta yegando cerca, nan a cuminza zwaai y benta bultonan di droga den lama.  Y nan no kier a stop pa nada, y asina un persecusion a sigui riba lama.

   Finalmente usando precision, e mariniernan a los tiro dirigi riba e Outboard Motors di e speedboat, y destrui nan.  Asina finalmente e Speedboat a stop instantaneamente y mesora tur cuatro tripulante a hisa nan mannan den laira.

   Nan a wordo deteni, y despues a bay bek y piki tur e bultonan cu a keda drief riba lama, y asina regresa pa e barco di Zs.Ms. Holland.  Riba potret por mira nan ta pasando e bultonan over for di e FRISC pa bay abordo di e barco Zs.Ms. Holland.

   E cuatro sospechosonan y e droga a wordo traspasa despues pa US Coast Guard, pa asina nan wordo huzga riba teritorio Mericano di traficacion.

   E barco Zs.Ms. Holland desde comienso di September ta activo den Lama Caribe.  Durante operacionnan anti-droga, e barco ta den cooperacion estrecho cu US Coast Guard, y tambe Wardacosta di Caribe Hulandes.