Francél Bernardus di SPA ta relata:
ORANJESTAD (AAN) — Francél Bernardus, miembro di Sindicato SPA, den entrevista cu DIARIO a menciona cual ta e motibo di 'walk-out' cu a tuma lugar Dialuna mainta, na Scol di Polis na Lago Heights.
Bernardus a splica cu tin cosnan cu ta molestiando eynan, entre otro e mal condicion fisico di scol, unda e interior ta yen cu beskem, y tin mas di cien persona ta haci uzo di e lugar aki.
El a bisa cu realidad ta cu e lugar ta hopi deteriora y den pasado caba nan a bin wak e situacion, y a conseha scol pa traha un carta y pone den dje tur loke mester wordo regla. “Esey a wordo haci na 2022 y e carta a bay, y a keda di bin haci e cambernan limpi y drecha loke mester drecha y algun cos a wordo haci, pero no a resolve loke mester a wordo soluciona” Bernardus a comenta.
Bernardus ta den opleiding actualmente, y pesey alumno y juffrouwnan mes a acerca SPA, y a bisa cu ta basta mirando e situacion. Scol di Polis tin dos klas di mas di 25 alumno, e mes ta den un klas di 30 persona, pues practicamente tin 100 hende pa dia eynan.
Bernardus a bisa cu su grupo ta bin dos biaha pa siman y e otro grupo cu ta bin tur dia, ta consisti di 50 persona.
E ta kere cu pa e scol wordo bon drecha mester busca otro localidad pa sigui duna les anto sea nan basha e lugar abao trahe full di nobo, tin hopi trabao pa haci eynan.
E problema mas grandi cu nan tin ta beskem y esaki ta algo ferfelu pa kita; nan a haci algo riba dje pero el a sali bek. Tambe tin hopi comehein na tur skina di murayanan, E bañonan no ta funciona, actualmente tin solamente 4 of 5 den funcion pa tur e hendenan cu tin eynan. E cooler no tey mas, tin hopi paloma y sushi di paloma rond tur caminda, blafond habri ta cay, e gymzaal tin basta problema, pues algo hopi antihigienico, pa bin scol siña.
Pa wak si nan wordo scucha nan a tene accion. Francel Bernardus a bisa cu e tin bon contacto cu e persona cu ta traha cu Minister di Husticia, y e tin entendi cu e ta haciendo su best, pero tambe cu nan tin hopi trabao pero mester bin un prioridad pasobra con cu bay bin, nan ta den opleiding.
“Nos mes den nos infancia a bin akinan na scol, mayoria di nos a bin scol akinan y esaki ta e scol cu a manda polisnan caya”, Bernardus a remarca agregando cu un solucion ta urgente!
