E ta un Hyundai Accent cora
ORANJESTAD (AAN): Tabata den oranan di atardi, cu Central di Polis a manda un unidad di Strandpolitie rumbo na un Hotel riba Irausquin Boulevard como cu tin un Taxi Pirata cu a wordo gara eynan cu man den mansa.
Na caminda pa e Hotel, e unidad di Polis a ricibi informacion extra cu ta Personal di Departamento di DTP a gara e Taxi Pirata aki y tabata atende, y diripiente a haya necesario pa pidi asistencia di Polis.
E unidad di Polis a yega, y aki a papia cu dos funcionario di DTP. Nan a splica cu ultimo dia, e Departamento di Gobierno aki ta ricibiendo asina extra hopi reclamo di Taxistanan, cu cada rato nan ta mira un homber coriendo den un auto blanco, pero awor ta move den un auto Hyundai Accent color cora, y ta piki turistanan na varios Hotel y Resort, y despues baha nan otro lugar. E ta haci esey siendo cu e no tin ningun clase di permiso pa haci e trabao aki na Aruba.
Nan a bisa cu e auto Hyundai Accent aki ta hasta para mescos cu otro Taxi, dilanti Lobby di e Hotel.
Mientras Polis ta tumando tur e detayenan aki, un otro funcionario di DTP a mira un homber saliendo di e lobby. Nan a reconoce e homber aki como e persona cu ta coriendo como “Taxi Pirata”. El a cana y drenta den e Hyundai color cora, y a core sali bay.
Polisnan e ora a bay tras di e auto, y a duna e chauffeur un señal pa stop, y el a bay para te banda di Courtyard by Marrriott.
E homber a identifica su mes di inicial C., y agentenan a informe cu tin indicacion cu e ta haciendo trabao di Taxi Pirata. El a bisa cu ta apenas dia 1 di Februari 2024 el a yega Aruba, y ta desmenti cu e ta coriendo como pirata.
E momento ey enberdad e ta su so den auto, pues e ora ey Polis no por a haci mucho cos. El a wordo informa riba e consecuencianan si e sigui transporta turistaan den e auto.
Despues di esaki, Polisnan a bay na e Hotel pa haya mas informacion di e homber C. aki. Na e Hotel, agentenan a papia cu personal di e Hotel. Nan a indica cu enberdad e homber di inicial C. ey, tur dia di Dios ta yega eynan y ta pidi nan pa yude haya trabao pa transporta turista.
Polis tin atencion serio awor pa e caso aki. Ban spera cu e Procurador General nobo tambe tuma nota di e fenomeno aki cu lo por ta perhudicial pa Turismo di e isla. Den caso di un accident mes, e Aseguro di e homber ey lo no paga pa e daño y lesion di e turistanan. Pesey Taxistanan tin cu paga asina hopi Aseguro pa cubri turistanan.
Y si e turistanan keda sin haya cobertura di aseguro, bo por spera cu nan lo por hasta entabla caso contra pais Aruba cu ta permiti Taxi ilegal core rond asina.
Si bo tin mas detaye, corda duna informacion na Tipline di Polis na 111-41.
