Varios herido den accident Diasabra na Kudawecha

ORANJESTAD (AAN): Tabata Diasabra merdia alrededor di 12:40 pm, cu yamada a drenta na Central di Polis pa indica cu riba caminda di Calbas pa Noord,

na altura di Kudawecha 65 cu ta situa como 100 meter pabao di Veld di Softball di Kudawecha tin un accident basta pisa cu a keda registra, y tin “varios hende herida”.

   Mesora a cuminda manda unidadnan di Polis di Noord, como tambe a notifica Centro di Alarma pa dirigi Ambulans tambe pa eynan.  Mas yamada a drenta indicando cu tin riba di 6 hende herida.

   E accident a socede net den e birada aki, entre un auto sedan Hyundai Accenta color berde scur, y un auto compacto Nissan Cube color kima.  E Nissan Cube a dal fuertemente den banda drechi na e porta patras y wantalodo patras di e Hyundai.  Debi na e impacto aki, e Nissan Cube a keda mey-mey di e caminda.  E otro auto, esta e Hyundai Sonata color berde scur cu number A-51819 a baha di caminda como 15 meter banda pazuid, y a bay dal contra muraya di e compleho di Apartamento na Kudawecha 40.  Aki el a dal contra un serie di como 4 meter di awa poni eynan pa e Apartamentonan, y a laga esakinan destrui.  A yama personal di WEB Aruba NV tambe pa bin drecha e meternan kibra.

   Den ambos auto tabatin hende cu a resulta herida, incluyendo famia y mucha chikito den e Nissan Cube.  Como cinco unidad di Polis, incluyendo uno motoriza a yega eynan pa cera caminda.  A presenta tambe 2 unidad di Rapid Responder pa yuda den prome auxilio, y dos unidad di Ambulans.

   Personal di Ambulans a atende heridos tanto paden di nan Ambulans, como pafo.  Ora cu Polis ta papiando cu e chauffeur di e Hyundai Sonata, nan a bin nota cu e ta mustra di ta bao influencia, mirando cu e ta papia cu lenga pisa, y su aliento ta hole na alcohol di uso interno.  El a coopera pa haci test di supla, y ora di haci esaki, e resultado a sali malo pe.  Pesey mes el a wordo aresta pasobra a viola Articulo 5 inciso 2 di Ley di Trafico.