Un herido y un persona deteni den incidente durante wega di futbol U17

ORANJESTAD (AAN):  Diabierna anochi a registra un incidente na Bélgiëstraat, unda un gran cantidad di patruya policial y ambulans a movilisa pa veld di River Plate, na altura di e rotonde di Bélgiëstraat.  

E situacion a sosode durante un wega di futbol U17 entre River Plate y Bubali. Segun informacion ricibi, cada banda tin su propio version di loke a pasa, pero lo ta confirma cu un persona a resulta herida y otro a wordo deteni.

Segun testigo, e confrontacion a cuminsa ora cu di un banda a cuminsa tira palabra. E tension verbal a escala rapidamente, resultando den un confrontacion fisico entre ambos grupo.

Autoridadnan a yega na e luga pa controla e situacion y brinda asistencia na e persona herida. Ademas, a wordo indica cu ambos partido lo presenta nan banda di medaya dilanti AVB pa un evaluacion adicional di e incidente.