Trio di mucha a uza Pickup horta pa a bay cu e Motorcycle

Caso di Bubali a haya un rabo...

ORANJESTAD (AAN):  Diaranson anochi doño di un pickup tabata buscando tur caminda su Nissan Double-Cab pickup cu recientemente a wordo horta. E persona a haya un tip cu su pickup lo a wordo laga atras na altura riba e parkinglot di e casnan di dos piso di FCCA na Bushiri. Mesora e persona a bay na e sitio indica y enberdad a bin topa cu su Nissan pickup.

    Awor e storia a bira interesante!  Pasobra a sali na cla cu e mesun Pickup aki a wordo uza pa e tres muchanan hoben cu a horta e brommer na Bubali (articulo di Pagina 2) di cual tabata tin un grabacion di e ladronicia riba medionan social. Mama di un di e hobennan a reconoce su yiu menor y mesora a bati alarma y a presiona su yiu pa admiti y tambe bisa unda nan a sconde e brommer.

   E lugar unda a bin topa cu e Nissan Pickup no ta mucho leu di e cas di e tres ladron hobennan aki, pues aparentemente despues di a uza e pickup nan a staciona e pickup  sin plachi number  y nan lo a cana bay cas.

   Polis tambe a presenta na e lugar unda e pickup a wordo laga atras  pa asina confisca e pickup pa haci mas investigacion.  Takelwagen a bay cu ne.  No ta conoci si e desaroyo nobo aki lo bay awor si afecta e trio di muchanan.