Unit Narcotica ta keda activo
- Haya hopi droga na un Drive-Thru di Droga na Sero Alejandro
ORANJESTAD (AAN): Vocero di Polis, Liliana Rasmijn a confirma cu oficialnan hudicial di Unit Narcotica riba Diaranson cu a pasa a tene un razzia na Playa.
Den e entrada hudicial aki, nan a haci 1 detencion na John de Wittstraat. Ta traha aki di e homber inicial R.R.A.H. di 26 aña. Esaki relaciona pa bendemento di cocaina tipo base.
Diahuebs den oranan di atardi Unit Narcotica a tene diferente razzia mas. E prome entrada hudicial tabata na Sero Alejandro na unda a detene 6 cumprado saliendo di e cas menciona. E tabata parce un cas cu ‘Drive-Thru’ pa cumpra droga. A haci un entrada hudicial na dicho adres y a detene 3 persona mas.
Ta trata di e muher di inicial S.H. di 67 aña, otro hende muher di inicial S.C.S.S.A. di 32 aña y e homber di inicial S.C.J.S.A. di 31 aña. A confisca diferente droga cu a haya eynan, manera cocaina, marihuana, LSD y un suma grandi di placa.
Despues di esey, Unit Narcotica a move y tene un razzia na un cas na Santa Martha. Den e entrada hudicial aki na Santa Martha, nan a confisca un cantidad grandi di placa.
Cuerpo Policial ta keda haci suplica na pueblo cu esnan cu sa algo of a wak algo pa yama nos tiplijn di polis cu ta 11141. Bo ta garantisa di keda anonimo.
