ORANJESTAD (AAN): Oficialnan hudicial ta haciendo un suplica publico, na e persona kende a duna informacion valioso den un caso, pa e drenta den contacto cu nan.
Recherche ta pidi pa informacion pa cu caso di Drive-by Shooting cu a cobra bida di e dama Nayibe Isabel Herrera di 31 aña, cual caso a socede riba un Diamars anochi laat dia 18 juli 2023.
Departamento di Recherche ta haci un suplica na e persona cu a duna informacion poco tempo pasa relaciona cu e caso di Drive-by Shooting aki... pa tuma contacto cu nan bek.
Ta asina cu dia 18 juli 2023 pa 10:55 pm, Central di polis ta wordo notifica di un Drive-by Shooting na altura di Bar-Abar (ex-United Dinner) na Driemasterstraat. Esaki a cobra bida di e dama Nayibe Isabel Herrera.
Recherche ta tras di un bon pista. Nan ta na altura cu ta trata di un grupo cu ta involucra den hortamento di auto como tambe den e tiramento y e motibo pa cu esaki. Ta pidi e persona cu a duna e informacion poco tempo pasa, pa yama bek y ta garantisa di keda anonimo.
Cuerpo Policial Aruba un biaha mas ta haci un suplica pa cu esnan cu a mira algo of sa algo di e caso encuestion pa yama e tiplijn di polis: 111-41. Bo ta keda anonimo.
