ORANJESTAD (AAN): Otro paisnan ta usa tecnologia di satelite cu ta reconoce e ‘wavelenghth’ di e color berde di e blachi di matanan di Cannabis pa asina haya sa mesora unda tin plantacion ilegal.
Pero na Aruba, sea accidentalmente, of via investigacion, of danki na tips di ciudadanonan, ta haya sa unda tin plantacion di marihuana riba e isla.
Den fin di siman, durante un razzia, e asina yama Project Team Drugspanden di autoridad local a detene un persona y a confisca basta mata di marihuana.
Project Team Drugspanden ta un team cu a worde lanta pa entre otro investiga bendemento di droga for di un cas. En conexion cu un investigacion andando Project Team Drugspanden a bay na un cas na Piedra Plat y a detene e hombernan di inicialnan J.F.E.E. naci na Aruba di 40 aña, tambe J.H.D.E. naci na Hulanda di 33 aña, y D.D.R. naci na Hulanda 42 aña.
Vocero policial a confirma na DIARIO, cu durante e entrada hudicial a confisca un cantidad basta basta matanan di marihuana y artefactonan cu tin di haber cu cultivacion y distribucion di marihuana.
Diferente teamnan special manera: K9-unit, departamento tecnico di Cuerpo Policial y otro teamnan tambe a participa na e entrada hudicial aki.
Pa Cuerpo Policial por resolve mas caso cooperacion y informacion di pueblo di Aruba ta hopi importante, pesey nos ta pidi si bo tin cualkier informacion yama nos tipline na 111-41. Nan ta garantisa cu bo ta keda anonimo.
Potret aki pa cortesia di awe24.com
