ORANJESTAD (AAN): Tabata Diasabra marduga banda di 2:20 am, cu yamada a drenta na Warda di Polis na Santa Cruz,
cu e detaye cu un biaha mas dos homber desconoci a bula cura di Warda di Balashi y a bay den e parti unda tin autonan staciona paden.
Polis a core tira bista riba nan imagen di video cu nan por mira for di Santa Cruz, y a mira cu berdad riba e parti paden di Balashi tin un persona full bisti na preto ta tratando di saca un motorcycle di eyden. Nan ta purba di sake via e muraya banda pabao. E video ta capta tambe cu e homber ta bisti den jogger preto y T-shirt preto. E motorcycle ta mara cu cabuya na e wiel dilanti y cu esaki nan ta purba di hise pa pase over di e muraya.
Ora cu a bira e camera, a nota cu tin 2 homber mas riba e tereno. Uno di nan ta bisti cu un sweater blauw y short cora, y tin color di cuero cla. E otro homber ta bisti cu shirt maron, jeans blauw largo, y tin color di cuero bruin. A nota tambe cu tin un trapi poni na e muraya parti paden di e muraya.
Mientras tanto unidadnan di Polis a cuminza mobiliza pa e area, y tabata ricibi update di esnan mirando video. Unidadnan di San Nicolas, y tambe unidad di K-9 a yega y a logra gara un homber banda pabao di e negoshi Budget Marine.
Polisnan despues hunto a dicidi na bay rond di Warda di Balashi, y nan a mira cu tin un auto parcialmente staciona den mondi. Nan a bay check y topa cu un SUV modelo Ford Everest shinishi sin plachi di number. Tabatin un homber aki, y Polis di K-9 a ordena e persona pa e no move. Aki ta unda cu Polis a bin nota cu tin dos figura masculino patras scondi di e auto.
A wanta e hombernan aki, y a nota cu nan descripcion ta cuadra cu e detaye cu a ser mira riba e video. Polis a aresta e sospechoso di inicial A., y e otro cu a keda deteni ta di inicial Y. Ambos ta wordo sospecha di viola Articulo 2:286 como tambe 1:119 di Codigo Penal di Aruba. E di tercer sospechoso di inicial P., a wordo deteni door di Polis di San Nicolas.
Nan ta deteni awor pendiente mas investigacion.
