ORANJESTAD (AAN): Tabata Diadomingo banda di 5:25 pm, net ora cu unidad di Polis di San Nicolas ta coriendo den Colony,
y ta pasando banda di Rum Reef, ex-Esso Club cu nan a bin nota cu tin un hogamento andando e momento ey.
Esaki nan a nota, ora di a mira un homber na careda rumbo pa Rum Reef, y nan a mira un grupo di muher ta rek y tratando di saca un persona femenino for di lama.
Mesora Polisnan a rek careda baha y a bay yuda, y nan a logra di saca e dama di inicial E. for di awa. E dama no tabata reacciona, y unavez riba tera, Polis a cuminza practica CPR riba dje. Cu esaki diripiente e dama a cuminza vomita basta awa for di su curpa, y aki a habri su wowonan.
Ningun di e hendenan cu tabata eynan no conoce e dama. Nan tabata djis na beach y a tende un hende grita, y nan a mira e dama cu problema den lama.
Polis a pidi Central pa urgentemente manda un unidad policial mas pa yuda nan, y tambe a pidi pa manda Ambulans cu urgencia.
Un poco rato despues, e dama E. ainda abao na canto, a cuminza pidi pa su casa. Aki agentenan a cuminza nota cu e persona aki lo ta un tiki bao influencia di alcohol.
Algun rato despues, e cabayero di inicial F. a presenta, y el a declara na Polis cu su pareha tabata bebe alcohol, y tambe a bebe un pildora analgesico pa dolor. Despues el a drenta den lama. Kizas esaki lo por a pone bira malo.
Ambulans a yega, y Paramediconan a bin tuma tur pulso y observacion di e dama. Na final a pone Central di Polis na altura! Sigur un pabien na Polis cu a yuda rapidamente danki na training di CPR cu nan a ricibi, pa reanima cualkier victima den problema.
