Tres dama herida despues cu UTV a bolter na rotonde di Wayaca

Chauffeur deteni pa maneho bou influencia

ORANJESTAD (AAN):  Diamars anochi, poco prome cu 7:00 di anochi, alarma a wordo bati pa un accidente serio na rotonde di Wayaca, unda un UTV Honda color blauw a bolter y tres dama a resulta herida.

Ora unidadnan di emergencia a yega na e sitio, nan a topa e vehiculo riba su banda. Tres dama tabata herida, di cual un a keda pega den e UTV despues di e impacto.

Paramediconan a determina cu tabata necesario pa uza e materiaalwagen pa por libera e dama, kende tabata den un posicion dificil pa saca y cu posiblemente a sufri golpinan na su lomba. Bomberonan cu a presenta na e sitio a logra saca e dama for di e vehiculo y entreg'e den cuido di e paramediconan. E otro dos damanan herida tambe a wordo transporta pa hospital pa atencion medico.

Segun un testigo cu a mira locual a sosode, e tabata para pa subi e rotonde momento cu e UTV, cu cuatro persona abordo y biniendo for di panort, a perde control. E vehiculo a keda lastra y a termina contra e acera, pa despues bolter.

Dos di e damanan a cay riba e pasahero cu a keda pega den e vehiculo. E chauffeur, un cabayero local, a logra sali sin heridanan.

Sinembargo, polis di trafico a detene e chauffeur na e sitio, pasobra parce e tabata stuur bou influencia y tambe cu e tabata coriendo na velocidad excesivo.

Un van di CEA a presenta pa transporta e sospechoso pa warda di polis.

Tur tres dama herida a wordo hiba hospital pa evaluacion y tratamento medico. Te na momento di redacta e informe aki, no tabata conoci si e UTV ta pertenece na un compania di huur of na un propietario particular.

Polis ta sigui investiga e causa exacto di e accidente.