Tres chabelito a horta Scooter y algun ora despues ya a spuit y cambia su color

ORANJESTAD (AAN): Ni Diabierna Santo ladron no ta respeta mas! 

Esey ta loke por bisa, ora cu tres homber di edad hopi hoben a dicidi na drenta cura di un cas den Driemasterstraat, y a bay cu un Scooter cu un dama a cumpra recien riba su mesun forza, pa asina e tin algo di move pa bay trabao.

   Tabata hopi fuerte pa e dama, ora el a realiza cu ladron a drenta entre 9:45 pm y 11:00 pm.

   Nan a lastra e Scooter di marca Sigma Max di 125cc color preto cu cora, cu number MFA-804, y a bay cune rumbo pa Madiki Kavel y Paradijs.  Den e asiento di e Scooter, e dama tin su Paspoort y tambe su Bril di Bista.

   Loke e 3 chabalitonan aki no a realiza, ta cu e cas aki tin Security Video Camera cu a graba tur cos! 

   Diasabra atardi banda di 4:45 pm, un unidad di Polis di Playa a ser manda na Driemasterstraat pasobra awor si nan por wak e video di Security Camera pa mira e ladronnan aki.  Un pabien na Patruya di Playa cu si ta dispuesto pa mira Security Video, pasobra Patruyanan di Noord no gusta wak Security Video.

   E Security Video na Driemasterstraat a mustra cu e hobennan aki a kibra e housing di palo cu tin riba e Motor di e Porta di Garage.  Di e forma ey nan a mishi cu e instalacion, y pone cu asina a logra cu e Porta di Garage a habri manualmente.

   Despues di a habri e Porta di Garage, el a cana bay direct pa e Scooter.  Polis a mira e caranan basta bon, y a pidi pa haya e Security Video aki poni riba un USB Memory Stick pa nan sigui cu e investigacion.

   E tres ladronnan hoben aki a bay cu e Scooter, y a usa bleki di spuitverf color maron pa asina kita e color cora di e motocycle.  Nan a cambia e shield, a kita e spiel, pa asina spera cu Polis no ta reconoce riba caya.

   Y mesora nan a cuminza core cune riba caya.

   Menos di 4 ora despues, e Scooter aki ta coriendo den area di Madiki, y un unidad di Polis a pasa mire ta core.  E no tabatin plachi di number poni.  Autoridad a dune señal pa stop, pero e manehador no a haci caso, y a sigui core.

   Sinembargo e manehador ta hopi amateur riba Scooter, como cu e no por domine bon, y dado momento el a dicidi pa bula for di esaki, pa cana na pia bay den pida mondi.  E Scooter a keda core un tiki su so y a bay dal den un auto banda di caminda.

   Den e coremento aki, a hasta dobla e riem dilanti.  Pero Polis a reconoce e manehador di entre 14 y 17 aña, y un ora pa otro su number lo hunga.  E lo tin di bay basha abao tambe ta kende ta e otro chabelitonan cu tabata cune ora di horta Scooter di hende.

   Tanto e paspoort y bril di bista di e dama, tabatey keto bay poni den e asiento.