El a keda deteni
ORANJESTAD (AAN): Autoridadnan awendia tin asina hopi acceso na sistemanan cu por trace un yamada, y tambe si bo manda message of email. A base di tur esaki, posiblemente na un forma facil autoridad local a bin haya sa ta kende a duna e alarma falso di bom recien na un Highrise Hotel.
Esey a pone cu a haya autorisacion di Fiscal, y riba Diahuebs mes oficialnan di Recherche di Noord a detene un persona, y esaki a socede na altura di un Timeshare Resort na Eagle.
Segun vocero di Ministerio Publico, Ann Angela, e sospechoso aki ta un trahador di e hotel mes!
Manera por corda, tabata Diabierna atardi un yamada menazante a drenta na Holiday Inn, avisando cu tin un bom. Esaki ta suficiente pa e Hotel activa nan ‘draaiboek’ pa cu e protocol den situacion asina, y a core avisa Polis di e asunto.
Esaki a pone cu personal di Security a cera entradanan di e Hotel, y asina autoridad por a haci un control y ‘sweep’ henter e propiedad pa asina mira si por topa cu cualkier novedad den e edificio.
E accion aki a causa basta inconveniencia pa huespednan, cu tambe a bira nervioso cu e situacion. Pero a lo menos nan ta para pafo leu di e peligro. E sona cerca di e Hotel tambe a conoce blokeo di trafico cu a causa un caos.
Despues cu a controla full e area y no a mira nada, e Hotel a habri back y e atardi y anochi a sigui normal. Pero Recherche a cuminsa traha riba e caso y facilmente a logra soluciona esaki.
Ta incomprendible pa pensa con un persona cu ta labora den mundo di horeca, ta bin cu e locura aki di duna un bom melding cu ta afecta turismo di Aruba na un forma masha mahos mes. Ta parce cu e trahador aki no tin nada di amor pa trabao den mundo di turismo. Simplemente e no mester haya trabao nunca mas den mundo di turismo na Aruba! Pasobra e tin un mente destructor cu por paralisa e industria aki den un forma mahos.
