ORANJESTAD (AAN): Desde cu Cuerpo Policial Aruba a anuncia cu lo tin un control Nacional durante e fin di siman di Halloween,
por a mira cu nos comunidad a reacciona positivamente p a cu e mensahe di concientisacion y prevencion. Tabata for di diabierna anochi e controlnan rond di Aruba a cuminsa conhuntamente cu Unidad Motorisa, Polis di Trafico, studiantenan di Scol di Polis, Polisnan uniforma di diferente Districto, K9 Unit, Fiscal, Ministerio Publico, departamento di communicacon di Polis y como tambe e bus y personal di CEA pa transporte.
E prome anochi a bay fructifero maske cu KPA a informa di e control. Polis a logra kita 19 chauffeur cu a maneha auto bou influencia for di caminda. Un chauffeur femenino a wordo deteni dos biaha den mesun anochi pa maneha bou influencia, Un persona no a sigui ordo di polis. Ocho persona a perde nan rijbewijs. Dos persona indocumenta a wordo haya ta maneha auto bou influencia. Nan a wordo traspasa pa GNC pa wordo deporta.
E di dos anochi, Polis a kita mas persona bou influencia for di caminda publico. Den total di 16 persona a pasa nan anochi cerca polis. Seis chauffeur a perde nan rijbewijs. Dos no tabata tin rijbewijs mes. A detene un persona indocumenta. Cuerpo Policial Aruba ta satisfecho con e control a bay.
