Trafico a tranca formalmente ora pickup ranca palo di luz na Cura Cabay

ORANJESTAD (AAN): Diadomingo atardi durante cu e Parada Cultural tabata tumando luga; a sosode un accidente di trafico na altura di Cura Cabay Store.

   Un pickup Chevrolet color blanco pa un of otro motibo a perde control y ta dal contra un palo di luz cu tin pazuid di caminda.

   E impacto duro a causa cu e palo di luz a kibra y a keda colga sin cay, danki na e wayanan di coriente, mientras cu e pickup tambe a keda contra e palo di luz.

   Polis a yega, y a haya nan obliga na cera e caminda, y esaki a ocasiona un enorme stagnacion den trafico.

   Polis a pidi un ambulance y na yegada, e Paramediconan a opta pa hiba e chauffeur rumbo Hospital pa haya tratamento medico, debi cu el a golpi durante e impacto.

   Personal di NV Elmar cu a yega y a mirando e daño y cu tin di bay haci reparacion urgente pa alivia e congestion di trafico, mester a saca algun truck di NV Elmar for di nan sucursal na Hato y bao escolta di polis pa yega Cura Cabay cu nan.  E trucknan mester a yega pa lanta e palo di luz, pa asina trafico por a sigui move.