Polis a gara 2 piroman
ORANJESTAD (AAN): Regularmente ta cende candela riba dump di Parkietenbos. Esey ta percura pa molester y ta dañino pa hende y pa medio-ambiente.
Siman pasa, den e anochi di Diamars 16 di Augustus pa Diaranzon 17 di augustus, tabatin candela atrobe riba dump. Serlimar a haci denuncia na polis di e cendemento di candela aki. Polis lo start un investigacion. Riba cendemento di candela tin castigo di prison.
Na januari 2022 minister di integridad, transporte y naturaleza a haci denuncia di cendemento di candela riba dump. Relaciona cu e denuncia aki KPA a hiba un investigacion, loke a hiba na dos sospechoso cu a confesa tambe. E sospechosonan aki lo worde persigui na september venidero.
Na personanan cu por dispone di informacion tocante e cendemento di candela den e anochi di 16 pa 17 di augustus ultimo y tocante e hendenan responsable pa esaki, ta bay un yamada pa meld nan mes na polis.
Hopi biaha, candelanan riba dump ta start di nan mes “via naturaleza”, ora cu yobida di awacero ta mezcla cu cierto quimico cu ta acumula den dump, esaki ta crea un reaccion cu ta produci cayente y candela ta start.
Pero e biaha aki, danki na investigacion a logra pone man riba dos persona piroman cu a admiti di a hasta start candela riba dump na Parkietenbos.
