Bon trabao di Polis
ORANJESTAD (AAN): Diasabra marduga banda di 3:45 am, net ora cu unidad di Polis di Playa ta coriendo den Rancho y pasando riba Visstraat, nan a mira un Toyota Yaris shinishi para mey-mey di caminda, cu tur dos porta dilanti hancho habri, y musica ta blaas sin fin.
Ora cu Polis ta yegando cerca, autoridad a mira claramente con huma diki ta sali for di e banda di chauffeur, acompaña pa holor fuerte na marihuana.
Na momento cu e chauffeur a bira su cara y ripara cu ta Polis ta para banda di dje, mesora el a dobla su curpa un tiki, pone su auto den speed y a cuminza move. El a move bay zuid den Visstraat, y bira man robez drenta Emanstraat bay pariba.
Polis a sigui su tras, y a nota cu e auto aki ta coriendo poco-poco y ta zig-zag riba caminda. Polis a cuminza sospecha cu e chauffeur y ocupantenan ta tratando di sconde algo.
E agentenan a core duna chauffeur un señal pa e stop, y el a para banda di e parkinglot di ex-Texas Furniture Store.
Aki Polis a duna ordo pa e chauffeur y tambe e ocupantenan baha di e vehiculo. Un biaha mas Polis a bolbe haya holor fuerte di marihuana, cu a lanta sospecho cu nan ta humando esaki of tin hopi den nan poder.
Di e auto a baha 2 homber y 1 muher.
Polis a puntra e chauffeur y e ocupantenan si nan tin algo ilegal den nan poder of den e auto. Nan a bisa cu nan a caba di huma un cabito di marihuana. Polis a rista tanto e chauffeur y e ocupantenan, y no a haya nada particular.
Ora cu a bay listra den e auto, e agentenan a bin haya varios placa larga, tanto placa Arubiano, Mericano, y Antiyano, cu ta benta tur caminda den e vehiculo. E middle-console mey-mey di e asientonan dilanti, tabatin e man di handrem un tiki hisa y e ta raro di banda. Esaki no tabata cuadra cu e resto di e middle-console.
Polis a usa nan flashlight y asina a mira cu bao di e palanca di e handrem, tin un sakito di plastico transparente, y dos pida di e contenido ta scondi cu ‘napkins’ y conteniendo marihuana, tambe dos pildora color berde.
A sigui busca, y diripiente Polis a bin topa un arma di candela, y tambe varios municion. Relaciona cu esaki, Polis a pidi refuerzo di otro unidad pa yuda nan.
Aki ta unda cu nan a detene e homber di inicial B., pasobra el a viola ley di arma y ley di droga. Tambe a detene e persona di inicial T., y e personacial Q., pa viola ley di arma y ley di droga.
Tur dos homber y e muher a wordo transporta pa Warda di Polis, unda Fiscal Auxiliar a duna ordo pa nan wordo encarcela pa interogacion. E droga y demas atributo a wordo confisca. E arma di candela a wordo pasa pa oficialnan forensico di BFTO pa bay haci investigacion, pa check den ki tipo di crimen kizas esaki a wordo usa recien na Aruba.
