Test toxicologo lo tin di wordo haci pa haya sa causa di morto di Turista Nicaraguense

Posible caso di overdose di Dialuna atardi

ORANJESTAD (AAN): Manera cu DIARIO a trece caba den edicion di Diamars, un turista Nicaraguense pero residencia na Merca, a fayece den di 2 piso di un parti di edificio bashi na segundo piso, cu tabatin ‘Ladies Choice’ den dje.

   Dialuna atardi pa 5:35 pm, Central di Polis a manda patruya di Playa urgente pa Klipstraat, na un edificio di 3 piso un tiki pariba di Driftwood Restaurant, como cu un hende ta hopi grave eyden y ta perdiendo rosea.  E persona a cuminsa pidi pa auxilio tanto na spaño como na ingles, y e mes ta pidi pa yama Ambulans.

   Ora cu Polis a yega na e adres, a bin haya algun hende cu a cuminsa practica CPR caba riba e persona masculino cu tabata bayendo fo’i tino.  A sali na cla cu e persona masculino aki ta un turista di habla hispano, y el a drenta e edificio abandona aki na di dos piso pa bebe alcohol, y posiblemente tambe droga.  E lugar no ta wordo usa, pues kizas nan ta usando e espacio di 2ndo piso pa ‘bati curpa cu droga’.

   Paramediconan a yega y a nota sintomanan mesora cu lo por ta indicacion di overdose di droga.  Sinembargo ya e ora ey, ni CPR y demas reanimacion no tabata yuda mas, y ora di pone e aparato di curason a detecta cu e no tin señal vital mas.

   Mesora a pidi Centro di Alarma pa manda Docter.  Unidad di Bombero tambe a yega na e lugar, y a manda busca Recherche.  A seya e edificio, y a busca Team Forensico di BFTO.

   E turista tabata core cu un auto di huur, pero e Kia Picanto blanco no tin un V-nummer riba dje.

   Dr. Texier pa 6:20 pm a constata morto di e turista J.E. di 53 aña naci na Nicaragua, pero residencia na Merca.  Fiscal a dicidi pa confisca e curpa pa investigacion, pa check si ta trata aki di crimen, pues lo haci text di detecta contenido di substancianan toxico den su sanger y mas.