ORANJESTAD (AAN): Oficialnan di Recherche pa algun dia caba ta ‘track’ e movimento di un sospechoso hopi peligroso, kende ta mustra di ta envolvi den un supuesto caso di intento di Asesinato riba un oficial di Polis.
Haciendo uso di vigilancia, di monitoreo, y procesa tur informacion, e oficialnan aki a compila hopi informacion di e persona aki su alrededor, nan sa cu kende e ta papia, y unda e ta anda. Tambe nan sa su forma di ‘modus operandi’, y aki ta uno caminda cu Recherche a tene hopi cuenta cune.
Esey ta cu tur indicacion ta mustra cu e sospechoso aki ta un hoben cu ta obsesiona cu arma di candela. Pues aki a pone den balans, cu ora nan bay detene e persona aki, lo tin di bay cu tur cautela posible, y gara e persona na e momento cu menos e ta spera.
Esey ta exactamente loke a socede Diasabra atardi. Despues cu Fiscal a duna OK pa orden di aresto di e hoben peligroso aki, a busca yudanza di Team di Aresto. Pasobra a dicidi cu no ta bay detene e persona aki na su cas, ni otro lugar. Pero lo bay busca forma pa gare mey-mey di caminda.
Danki na vigilancia secreto, a mira con Diasabra atardi el a drenta den un Nissan March color dark-purble, cu tinted windows y tabata mobilizando den area di Playa. Recherche bon arma hunto cu Team di Aresto, tambe tabata coordinando pa asina gara e persona aki.
Net na e cruzada di Wilhelminastraat cu Adriaan Lacle Boulevard, e team a dicidi na ‘changa’ e chauffeur, y oficialnan bon arma a baha y bay mesora riba dje. Casi e no por a haci nada mas. Esaki ta e cruzada cu tin net pabao di NV Elmar su oficina principal.
Aki nan no a ni warda pa e habri porta, pasobra oficialnan di Team di Aresto mes a kibra e bentana banda drechi (e auto ta un RHD), y aki a gara e hoben, y mesora a bay cune for di e lugar.
E hoben deteni a wordo identifica como J.J.A. Stamper di 19 aña naci na Aruba. E ta deteni awor pa interogacion riba e acusacion serio cu tin contra dje.
Vocero di Polis ta bisa cu pa Cuerpo Policial por resolve mas caso cooperacion y informacion di pueblo di Aruba ta hopi importante pesey nos ta pidi si bo tin cualkier informacion yama e Tipline di Polis cu ta: 111-41. Nan ta garantisa cu bo ta keda anonimo.
