Taxi a dal peaton y lag’e den estado critico na Pos Chiquito

ORANJESTAD (AAN): Tabata Dialuna anochi, cu yamadanan a cuminza drenta tras di otro na Central di Polis,

pa raporta cu un accident basta serio a socede riba Green Corridor, na altura di e Parada di Bus banda pazuid, cu ta situa como 30 meter pabao di Rey Hing Supermarket.  Yamadanan ta indica cu un Van a caba di dal un peaton.

   Polis di San Nicolas a yega cu urgencia na e lugar, y a bin topa cu un persona masculino benta abao riba caminda, y como 25 meter mas pariba tin un Minivan tipo Hyundai Staria color preto, cu matricula TX-336.

   E impacto a socede ora cu e ciudadano adulto mayor di 63 aña a bay cruza Green Corridor, y lo no a ripara, of kizas no a calcula e movimento di e Taxi color preto bayendo direccion San Nicolas, cu a pasa dal’e.  E impacto tabata riba e via banda pazuid di caminda, y e victima a bay cay mas pariba banda panort di caminda.

   Ambulance di ImSan a yega rapido, y Paramediconan mirando e situacion cu e peaton adulto mayor di 63 aña tabata aden a traha mesora pa stabiliza su situacion, y despues a lant’e pone den Ambulance y sali cu maximo urgencia pa Servicio di Urgencia na Hospital HOH.

   Unidadnan di Polis a cera full e caminda aki, pa asina Polis di Trafico y e specialistanan forensico di BFTO por a yega y compila evidencia y documenta tur cos.

   Segun informacion oficial, e victima su situacion ta grave y el a ser manda mesora pa Unidad di Cuido Intensivo.  E rapport final ta bay wordo formula door di Polis di Trafico.