Scol pa Polis a haya pistolnan Glock nobo

ORANJESTAD (AAN): E siman aki, Minister di Husticia, Integracion, Transporte Publico y Energia,

mr. drs. Arthur Dowers, a haci entrega di pistolnan Glock nobo na Politie Opleidingsinstituut Watty Vos.

   E inversion di mas di 100.000 Florin ta forma parti di e esfuersonan di Gobierno pa sigui inverti den preparacion profesional y material adecuado pa personal policial.

   Minister Dowers ta enfatisa cu inversion den personal no ta limita solamente na formacion, sino tambe na disponibilidad di material di trabao moderno y confiabel. Ta esencial pa aspirantenan policial dispone di e recursonan necesario pa nan por prepara nan mes adecuadamente pa e responsabilidadnan cu nan lo bay eherce.

   E pistolnan nobo lo contribui na un formacion mas efectivo, caminda aspirantenan por desaroya nan habilidadnan den uzo responsabel y sigur di arma di candela. Un preparacion adecuado ta fundamental pa sigura cu futuro agentenan policial ta capacita pa actua profesionalmente den diferente situacionnan cu nan por enfrenta durante nan trabao.

   Cu e inversion aki, Gobierno ta reafirma su compromiso pa fortalece e formacion policial, cu enfoke riba profesionalismo, siguridad di e futuro agentenan y proteccion di nos comunidad. Un cuerpo policial bon prepara y bon ekipa ta esencial pa garantisa siguridad y mantene trankilidad den nos comunidad.