Dos habitante gravemente herida
ORANJESTAD (AAN): Apenas el a sali algun tempo pasa for di Prison di KIA, y algo a pone cu Diamars mainta su cerebro a bruha completamente, y a start cu un mainta di teror, cu a laga dos hende seriamente herida na un cas, y despues a ocasiona panico entre empleadonan na un compania. Y tur esaki ocasiona pa e recidivista Jean Pierre Croes.
Parce cu e no a siña su les den Prison di KIA, y riba Diamars ya for di marduga a start cu un racha di actonan violento. Marduga el a comete destruccion na un Barbershop tratando di busca forma pa drenta e negoshi, pero no a logra.
Ora cu solo a caba di sali, e tabata ainda riba su racha y a dicidi di bolbe bay busca cos pa horta. El a vigila y finalmente dicidi na drenta den un cas na Parkietenbos 77. Pero loke e ladron Jean Pierre no a spera, ta cu tabatin dos hende na e cas! E dos personanan aki a dicidi na lucha contra e ladron.
A resulta cu Jean Pierre tabatin un obheto skerpi den su poder, y el a dicidi na ataca e ciudadanonan cu esaki, y el a laga ambos cu herida grave na nan curpa. Di e forma ey el a core sali di e cas y core bay nort.
Un di esnan herida, a logra sali y a bay te na un cas eybanda situa na Barcadera, y aki a pidi yudansa. E prome yamada a drenta na Polis banda di 7:00 am, cu e indicacion cu e ladron Jean Pierre Croes atrobe ta activo y a caba di ataca dos ciudadano na nan cas.
Inmediatamente Polis di Santa Cruz como tambe Ambulans a acudi cu urgencia na e lugar, y autoridad a bin descubri un escena horible parti paden, pues manchanan cu plasnan di sanger tur caminda, y dos persona malamente herida. Uno di nan a haya 3 hinca fuerte, y esaki tabata sangra profusamente. Tambe tin uno cu dede corta cu tabata sangrando na e cas aki riba e potret.
Paramediconan cu a yega despues, a core stabilisa e victimanan, y cu urgencia a transporta nan pa Hospital.
Polis a core rond den e area di Barcadera y Parkietenbos, pero no a logra localisa Jean Pierre Croes. A core pidi yudansa tambe di Recherche di Santa Cruz, y a pone team forensico di BFTO tambe na altura.
El a bay otro lugar: Poco rato despues, yamada di asistencia a ser pidi for di e tereno na Sero Tijsji di deposita bales conteniendo restonan procesa di sushi. Esaki ta e area panort di e planta di Ecotech na Barcadera.
Mesora Central di Polis pa banda di 7:30 am a dirigi unidad di Polis di Santa Cruz pa e lugar, y varios unidad mas tambe a mobilisa pa e lugar. E informe ta cu un homber sunu a yega riba e tereno, y ta pasando di Truck pa Truck, tratando di horta uno di nan. E trucknan aki ta di Ecotech. Den su intento di horta, el a comete destruccion na algun Truck, te cu finalmente el a haya uno cu el a logra start. Pa colmo el a hasta cuminza move cu e Truck y tabata buscando forma pa sali di e tereno cu esaki.
Demas personal di Ecotech cu a bati alarma, a core actua y a logra blokea e Truck aki, y e vehiculo bao comando di Jean Pierre Croes a bay dal sea den un baranca of un buraco grandi y a keda pega.
Polis a yega net e ora ey, y a habri porta y saca Jean Pierre sunu mes di eyden, y a areste. Personal di Ecotech ta satisfecho cu nan a logra stroba e intruso aki di bay cu nan vehiculo, pasobra ningun hende por pensa ta kico e lo ocasiona riba caya subiendo cu esaki riba caminda.
Ningun hende na tereno di Ecotech a keda herida.
Den un di e Trucknan, Polis a bin haya un T-shirt lora, y den dje tabatin un obheto skerpi. Ta trata di un cuchiu basta grandi, y Polis ta sospecha cu esaki lo ta e arma cu a wordo usa pa herida y hinca e dos ciudadanonan na e cas na Parkietenbos. Team forensico di BFTO tambe a bay na e tereno na Ecotech pa asina tuma e arma over.
Loke a sali na cla Diamars mainta, ta cu e momento a yega pa Ministerio Publico exigi castigo aun mas halto pa e persona aki. Jean Pierre Croes ta simplemente un peligro pa seguridad nacional. E ta un menaza mortal pa tur ciudadano, y ohala cu Cuerpo di Huesnan por mira con necesario ta pa lag’e cera y percura pa e no sali liber mas.
E homber deteni a wordo hiba pa Warda di Polis na Santa Cruz, unda Fiscal Auxiliar mesora a duna ordo pa e keda encarcela pendiente investigacion.
