ORANJESTAD (AAN): Cu suficiente prueba y indicacion, Ministerio Publico a bay di acuerdo cu e peticion di Unit Narcotica di Cuerpo Policial,
pa nan tene un razzia di sorpresa. Esaki a socede Diamars den oranan trempan di mainta.
Den coordinacion cu diferente Departamento di Cuerpo Policial, a move pa asina rondona e Apartamento aki na Hooiberg. Y asina di sorpresa a yega riba esnan na e cas, mientras unidadnan pafo ta percura pa ningun logra huy.
Durante e entrada hudicial a detene un hende homber di inicial E.R.R.M di 44 aña naci na Republica Dominicana.
E razzia aki tabata relaciona cu bendemento di droga. Na e Apartamento aki, a confisca un cantidad grandi di droga entre otro marihuana, cocaina y MDMA.
Durante e accion diferente departamento di KPA tabata presente. Ta trata di Unidad di K9 Unit y RRT.
Cuerpo Policial Aruba ta recorda comunidad cu sa of a wak algo pa yama e tipline di polis cu ta 111-41. Corda cu nan ta garantiza cu bo ta keda anonimo.
