Segun Francel Bernardus di SPA:
ORANJESTAD (AAN): Vicepresidente di Sindicato di Polis Aruba (SPA), Francel Bernardus, a expresa preocupacion tocante e impuesto cu agentenan policial ta paga ora nan traha overtime. Den un entrevista cu DIARIO, el a bisa cu e trabounan extra no semper ta resulta den e ingreso cu agentenan ta spera.
Segun Bernardus, e falta di personal den cuerpo policial ta haci cu agentenan mester traha oranan extra pa yuda garantisa ordo publico y siguridad pa tanto ciudadanonan como e turistanan cu ta bishita nos isla.
El a splica cu e situacion por resulta frustrante pa agentenan cu ta sacrifica tempo cu nan familia pa cumpli cu nan deber, mientras cu nan mes no ta responsabel pa e falta di personal cu ta existi pa un tempo basta largo caba. SPA den varios ocacion a trece esaki na oido di Gobierno, pero e situacion no a cambia.
Bernardus a indica cu e ingreso adicional di overtime por haci cu un persona ta cay den un categoria di impuesto mas halto. “Na final di luna, bo ta realisa cu bo ta traha asina tanto ora, y no ta wak e placa”, el a expresa.
Vicepresidente di SPA a menciona cu paisnan cerca di nos, entre otro Corsou y Merca, a stop di cobra impuesto riba overtime. El a indica cu un medida similar por yuda agentenan conserva mas di e ingreso cu nan ta gana cu nan oranan extra.
