Pustamento di auto a termina den accidente serio  

ORANJESTAD (AAN):  Diamars anochi den careda di 10'or y mey un accidente serio a sosode poco pabou di ex Pacifico Restaurant.

Prome informacion tabata bisa cu un di e autonan a bolter.

            Polis a bay e sitio cu urgencia. Ora nan a yega un di e autonan cu a bolter ya 'nan' a bolter e bek. Esaki tabata un Toyota Tercel color blanco.

            E accidente a sosode ariba e t-weg cu ta conduci pa bay Jaburibari, un caminda conoci pa accidente. Mas leu por a mira un Kia Picanto.

            E problema a cuminsa momento cu emocionnan a bay halto y alabes efecto di alcohol a tuma over. Palabranan di insulto y no sigui ordo di polis a pone cu a pidi refuerso.

            Informacion cu polis a ricibi y por a tende esaki tambe na e sitio cu e Tercel tabata pustando y e Kia Picanto lo a bira nan dilanti. 

            Dos persona a keda deteni, esta un tata y un hoben cu parce di ta su yiu. E tata a nenga di tabata stuur e auto durante e pustamento, pero un di su yiunan a bisa polis cu su tata tabata na stuur.

            Ambulance a presenta, pa a trata cu un otro yiu di e homber cu a haya golpi na pia pero nada serio.

            Elmar a presenta pa atende cu e wayanan cu a keda benta ariba caminda.