Problema atrobe net durante Fiesta di hubentud

ORANJESTAD (AAN): Tabatin hopi movimento Diabierna anochi riba caya.  Den oranan di anochi, Central di Polis a manda un patruya di Playa rumbo pa un club nocturno den Weststraat,

unda cu durante un fiesta di hoben a start un bringamento.  Esaki a escala di tal magnitud, te cu a yama pidi asisencia di Polis.

   Mesora mas unidad di Polis a yega pa evita cu e problema sigui crece. Ademas a dicidi e ora pa desvia trafico pa evita cu autonan ta sigui drenta Weststraat.  Y ora di atende e caso na e lugar, agentenan a tuma e decision pa para tur cos.

   Nan a informa e manager di e lugar, cu pa evita mas pelea y cu e por bay completamente for di man, ta stop e fiesta.  Esaki ta algo cu net esnan cu si ta comporta netchi, ta mira con otro gruponan cu ta yega fiesta cu e meta pa busca pleito, ta bin daña e ambiente pa otronan.

   Polisnan a keda eynan te ora cu tur hende a bandona e lugar.  Sigur esaki no ta e prome biaha cu e mesun sorto di fiestanan aki y na e mesun club ta termina na bringamento.