ORANJESTAD (AAN): El a bira un lugar unda autonan ta aglomera pa toca musica duro, pa otronan chill siendo cu tin gebiedsverbod.
Y den fin di siman a bin haya sa, cu e area rond di Tanki riba sero di Alto Vista ta wordo usa tambe pa gangnan confronta otro. Diadomingo madruga hasta a menciona cu un hende a resulta herida cu tiro eyriba.
Esaki autoridad a bin haya sa, ora cu na Servicio di Emergencia na Hospital, algun hende a trece un persona masculino cu supuesto tiro di bala na cabez, y e tabata sangrando.
Mesora personal di emergencia a bay atende e persona, como cu un tiro na cabez ta algo serio. Tambe nan a core notifica Polis den casonan asina. Di e forma ey Polis a bin haya sa di e asunto.
Sinembargo esnan na Servicio di Emergencia cu a haci e prome examen, a bin realiza cu e herida aki no ta causa pa un impacto di bala. Ta un otro obheto a dal den cabez di e persona aki, y e homber a bira histerico y spanta su alma keriendo cu nan a tire.
Vocero Policial Liliana Rasmijn a indica cu enberdad e sucedido di Diadomiongo madruga na tanki di Alto Vista, e victima masculino no tin herida di bala. E lo a ricibi impacto di un obheto manda riba dje cu consecuencia cu e la haya un herida na su cabez.
Pa seguridad, toch Polis a acudi rond di e area di tanki den oranan di madruga, y cu luz a check tur rond abao kico por haya. Pero te cu banda di 2:30 am, no a haya ningun huls benta abao. Esey por ta confirma e realizacion cu enberdad e persona no a haya tiro.
Pero prome cu Polis por a sigui cu e investigacion, a bin haya sa cu dos gang ta tratando di start pelea den parkinglot di Hospital. Y tur cos tin di haber cu loke a socede riba tanki di Alto Vista.
Polisnan a yega rapido, y mesora a realiza kende ta e hendenan cu ta buscando pleito, y a detene nan. Uno di nan ta un recidivista di Husticia, kende na numeroso ocasion a haye envolvi den problemanan grave, y su papel di castigo ta mahos mancha mes.
Nan a wordo deteni y hiba pa Warda di Polis pa asina Recherche por sigui cu e investigacion rond di henter e bada-bada aki. A busca un Takelwagen tambe pa transporta 2 vehiculo cu a wordo confisca door di autoridad, y pa bay listra esaki meticulosamente na Warda di Polis.
Un cos ta sigur, esta cu di awor en adelante lo ta bon pa Polis cuminza patruya mas regularmente anochi tambe den area di Alto Vista, y e demas tankinan cu tin rond di Aruba.
