Polisnan a evita cu chauffeur burachi a sigui pasa door di Palm Beach

ORANJESTAD (AAN): Agentenan atento di Polis di Noord, riba Diadomingo anochi cu bon wowo a mira un auto coriendo bastante malo y iresponsabel den area di Noord.

   Esaki ta cuadra cu informacion ricibi via telefon poco prome, di e auto aki coriendo roekeloos y spantando demas automobilistanan.

   Riba e caminda di Palm Beach cu ta bay pa e rotonde di Wendy’s, polis a mira e auto sedan coriendo.  E auto a bira den e camindanan patras di Wendy’s y eynan varios patruya a yega y asina a blokia su caminda.

   Tabata trata aki di un auto sedan Kia Rio color blauw.  Polis a yega y cuminda papia cu e persona.  Di biaha nan a mira cu e tin caracteristica di ta un hende bao influencia di alcohol.  E tabata papia cu lenga pisa, su aliento ta hole fuerte ta uzo interno di alcohol, y ora cu a ilumina su cara cu flashlight, a mira cu e payo aki su wowonan tabata bastante cora.

   A dicidi na pidi su cooperacion pa haci un test di AlcoSensor, y esaki a sali malisimo pues.  El a wordo baha di auto, y a pone boei na su mannan, y cu vehiculo di transporte a ser hiba na Warda di Polis, unda el a pasa resto di anochi den cel pa saca su wayaba.