Polis tin su lista di regla cla caba pa temporada di Campamento 2023

ORANJESTAD (AAN): Relaciona cu Semana Santa caminda cu nos ciudadanonan tin e costumber di bay campa, Alto Comisario di Polis Ramon Arhem ta haci un yamada fuerte na nos campadornan pa tene cuenta cu e

condicionnan bao di cual e permiso ta worde otorga.

   E fecha riba cual nos campadornan por cuminsa campa ta Diadomingo 2 april  2023 pa 12:00 di merdia. Kiermen riba e fecha y ora stipula ta permiti pa pone trailernan y tentnan riba nos beachnan.  Tur obheto cu worde poni prome cu e fecha y orarario stipula lo worde kita pa polis.  E ultimo dia di campa lo ta dia 16 april 2023.

   Despues di campamento tur obheto mester worde kita for di beachnan. Si esaki NO sosode polis lo kita esakinan riba gasto di e campador. Un yamada ta bay na un y tur pa mantene nos beachnan limpi. Deposita tur desperdicio den bari di sushi of den saconan di plastic.

   Ultimo dia pa entrega peticion pa campamento ta diaranson 15 maart 2023 entre 8:00 pa 11:30 mainta y entre 1:00 pa 4:30 pm.

   A añadi extra requisito na e permiso pesey tene cuenta cu e siguiente condicion cu ta wordo splica aki bao:

1. Riba e santo blanco na e beachnan bao ningun circumstancia ta worde permiti pa haci Barbecue, na otro lugar haci Barbecue solamente cu un Barbecue-Grill di gas.
2. Tent y trailernan cu ta worde uza pa campa mester ta den bon condicion.  Nan mester worde poni por lo menos 10 meter for di canto di lama y nan mester worde poni por lo menos 5 meter for di e caminda publico. Si NO cumpli cu e regla aki, polis lo kitanan.
3. Bao ningun forma ta wordi permiti pa reserva tereno pa campamento.
4. Tent, trailer y otro obhetonan cu ta worde uza pa campa no por worde poni riba otro lugarnan cu ta e lugarnan cu ta destinan pa esakinan y di cual lugarnan a worde destina pa Gobierno.
5. Den e tentnan/trailernan mester tin suficiente recursonan pa loke ta trata dunamento di prome auxilio. (E.H.B.O.)
6. Ta prohibi pa pone na tent/trailer, obhectonan of plachinan cu no ta cuadra cu moralidad.
7. E campamento mester socede conforme e condicionan bao di cual e permiso a worde otorga.
8. Ta prohibi pa core cu vehiculonan di motor, bicicleta, cabay y garoshi riba nos beachnan y principalmente na lugarnan caminda ta destina pa publico.
9. Ta prohibi di pega candela riba nos beachnan.
10. Ta prohibi di bende cuminda, softdrinks, mixdrinks, of cualkier otro tipo di articulo ariba beach sin permiso.
11. Musica por worde toca solamente for di den e trailer of tent den siman te 10:00 pm y den weekend te cu mey anochi di tal manera cu otro campadornan no ta worde molestia.  E uso di sound system/emplifiers etc. ta worde permiti solamente si otro campadornan no ta sinti molester di esakinan.
12. Ta prohibi pa cap mata, sin permiso.
13. Ta prohibi pa core cu boto y pa ankra esaki den e zwemzone. Tambe ta prohibi pa mara boto na e boeinan cu ta destina pa scheepvaart.
14. Ta prohibi e uzo di pallet y carton riba beach. No cumpli cu e regla aki polis lo kita esakinan.
15. Ta prohibi pa uza e beach of e palo di coconan como toilet.
16. Ta prohibi pa tin cabay y cacho riba beach.
17. Ta prohibi pa e campadornan uza e hutnan pa nan campa, nan ta worde laga liber pa e personanan cu ta bin pasa dia.
18. Bao ningun circumstancia mag di susha e beachnan. Boternan kibra of splinter di glasnan no mag di worde laga atras riba beach, ni tampoco por tira esakinan den lama. Esaki ta conta pa desperdicio tambe.
19. E permiso no mag di worde pasa pa un otro persona.
20. E poseedo di e permiso mester tin esaki den su tent/trailer na un caminda visibel pa polis.
21. E poseedo di e permiso mester tene cuenta cu e tin solamente derecho riba e lugar di campa durante e tempo cu efectivamente e ta campando, prome cu esaki bo no mag di reserva, marca, pone cabuya ect.
22. E poseedo di permiso ta keda responsabel pa cualkier daño na otronan debi na existencia di su tentnan/trailer of otro objeto.
23.  Indicacionnan di polis duna na interes di orden publico y seguridad di persona, bienes y basa riba moralidad mester worde sigui estrictamente.
24. Esun cu no actua conforme e condicionnan bao di cual e permiso a worde otorga ta worde considera di a actua sin permiso. E permiso eta worde revoca y bo por haya un multa.

   Un recordatorio pa tur campadornan cu e ultimo dia pa haci peticion pa campa ta dia 15 maart 2023. Sigui tur reglanan y pasa un dushi temporada. Nos di Cuerpo Policial Aruba lo controla durante campamento na tur parti di nos isla.