ORANJESTAD (AAN)- Vocero policial Liliana Rasmijn tin un mensahe pa mayornan, relaciona cu e caso di bringamento di dos hoben den un unidad di Arubus (no den bus escolar).
“Mayor, papia cu bo yiu, splik’e e consecuencianan ora nan haya nan mes involucra cu ley, ora nan yega cerca nos e ta un proceso caba, e ta haya un carchi di castigo (‘strafbaar kaart’). Pesey ta importante pa boso como mayor, como borg tambe splica nan.
Cuerpo policial tey a orden publico, tambe pa seguridad di cada persona na Aruba. Pues, tur esnan cu subi bus pa traha of bay scol, nan kier yega nan lugar bon y kier yega cas bon tambe”, Rasmijn a indica, y un bez mas ta reitera cu polis no ta tolera e actonan aki.
“Abo como hoben, comporta bo mes, si bo sinti cu bo tin un problema cu un hende, cu bo ta sinti amenaza pa algo, acerca polis. Acerca bo docente, un hende grandi pa asina tuma contacto cu nos, pa nos por wak y remedia e situacion aki”, vocero policial Liliana Rasmijn a acentua.
