Liliana Rasmijn di Polis a indica:
ORANJESTAD (AAN): Manera cu DIARIO a trece dilanti caba, awor Vocero di Polis, Liliana Rasmijn a confirma cu e aña aki tin extra rebendedor di klapchi cu a registra pa por bende esaki fin di aña.
Na December 2022 tabatin 57 rebendedor registra pa bende Klapchi na Aruba. Awor pa 2023 esaki a subi y a yega na 62 rebendedor.
E extra negoshinan pa bende Klapchi lo bay bin tanto na Distrito di Noord como tambe Distrito San Nicolas.
Ki dia lo cuminsa reparti klapchi e aña aki? Segun Rasmijn a splica, aña pasa e proceso ey a start di marduga caba riba 26 di December. DIARIO a compronde cu e biaha aki, nan lo transporta containernan den 2023 riba 27 December den oranan di marduga.
Semper ta unidadnan motoriza di Polis ta escolta e containernan cu ta sali for di deposito di Wela pa asina yega na lugarnan di bendemento.
Bendemento oficialmente ta start riba 27 di December 2023, for di ora cu solo sali, y tin di cera pa 9:00 pm tur anochi. Cualkier violacion di e reglanan aki lo nifica medida severo contra e rebendedor. Esey ta inclui perdemento di permiso pa bende.
Mescos cu aña pasa, publico por tira klapchi oficialmente te cu e deadline, cu ta 1 Januari 2024 pa 12:00 pm (merdia).
Controlnan di parti Polis y DOW na un forma regular. Pues no cu nan ta djis ricibi un bishita, esey nifica cu lo no haya mas bishita. Autoridad lo keda controla e kiosconan, pa ta sigur cu klapchinan riba shelf ta di 2022 y 2023, pues no ta acepta mas bieu.
Liliana Rasmijn a indica cu pa awor ta tur rebendedor sa di e reglanan caba, y nan ta percura pa cumpli cabalmente cu esey. Esey ta algo cu Polis tin hopi aprecio p’e.
